Երևանի քաղաքապետարանի տարեկան ծրագրով հիմնանորոգվում է Արին-Բերդի փողոցը: Այս մասին տեղեկացնում է Երևանի քաղաքապետարանը։ Աշխատանքների ընթացքին ծանոթացել է Երևանի քաղաքապետ Տիգրան Ավինյանը: Տասնամյակներ շարունակ անմխիթար վիճակում գտնվող փողոցը չի ունեցել ենթակառուցվածքային նվազագույն ստանդարտներ: Ծրագիրը ներառում է Արին-Բերդի փողոցի և Արցախի պողոտայի խաչմերուկը Արին-Բերդի փողոցի 5-րդ նրբանցքի խաչմերուկին միացնող 1.1 կմ երկարությամբ ճանապարհահատվածը: Նախագծի շրջանակում հիմնանորոգվելու է կամրջային 2 կառուցվածք, ամբողջությամբ փոխարինվելու են ճանապարհածածկի ստորին կոմունիկացիաները՝ ջրամատակարարման, ոռոգման և հեղեղատար համակարգերը, վերատեղադրվելու են արտաքին գազատարները, արդիականացվելու է արտաքին լուսավորության ցանցը, բոլոր հաղորդալարերը ևս անցկացվելու են ստորգետնյա կապուղիներով: Բացի այդ, կառուցվելու են հենապատեր, տրանսպորտային միջոցների կայանման գրպաններ, մայթեր, թեքահարթակներ, սիզամարգեր և ծառերի բնաբաժակներ: Աշխատանքների ընդհանուր արժեքը ավելի քան 948 մլն դրամ է։
