Ռումինիան Գալաց քաղաքում անօդաչու թռչող սարքի բեկորներ է հայտնաբերել հարևան Ուկրաինայի վրա գիշերային ռուսական հարձակումից հետո: Հաղորդվում է, որ տուժածներ չկան, վնասվել են էլեկտրահաղորդման սյունը և տնային կից շինություն: Սա առաջին անգամը չէ, որ Ռումինիան ահազանգում է իր օդային տարածք ներխուժելու մասին: «Պաշտպանության նախարարությունը խստորեն դատապարտում է Ռուսաստանի Դաշնության անպատասխանատու գործողությունները և ընդգծում, որ դրանք Սևծովյան տարածաշրջանում անվտանգության և կայունության նոր մարտահրավեր են», – ասվում է նախարարության հայտարարության մեջ: Ըստ Բուխարեստի՝ նման միջադեպերը ցույց են տալիս Մոսկվայի անհարգալից վերաբերմունքը միջազգային իրավունքի նորմերի նկատմամբ և «վտանգում ոչ միայն Ռումինիայի քաղաքացիների անվտանգությունը, այլև ՆԱՏՕ-ի հավաքական անվտանգությունը»:
