Հունիսի 22-23-ը Լոնդոնում կայացած «EBRD Green Cities Mayors’ Meeting»-ը համախմբել էր քաղաքային զարգացման ոլորտի առաջնորդներին, միջազգային ֆինանսական հաստատությունների և մասնավոր հատվածի ներկայացուցիչներին՝ քննարկելու ավելի կանաչ, դիմակայուն և կայուն քաղաքների զարգացման ուղիները։ Երևանի քաղաքապետի խորհրդական Սոնա Թևանյանը և Երևանի կառուցապատման ներդրումային ԾԻԳ-ի տնօրեն Անետա Բաբայանը մասնակցել են միջոցառմանը, որի շրջանակում քննարկվել են քաղաքային զարգացման ծրագրերի ֆինանսավորման, իրականացման և միջազգային համագործակցության ընդլայնման հնարավորությունները։ Հանդիպման կարևոր բաղադրիչներից էր մասնակից քաղաքների միջև փորձի փոխանակումը՝ ծրագրերի իրականացման, մոնիթորինգի և ֆինանսավորման ուղղություններով։ Մասնակիցները նաև ծանոթացել են Լոնդոնի մի շարք հաջողված քաղաքաշինական նախագծերի և կայուն զարգացման լուծումների։ Միջոցառումը հնարավորություն տվեց ծանոթանալ քաղաքային զարգացման առաջատար փորձին և ձևավորել նոր համագործակցային կապեր՝ ուղղված Երևանի զարգացման ծրագրերի արդյունավետ իրականացմանը։
