Առնվազն վեց պակիստանցի զինծառայող է զոհվել Քանդահար նահանգում աֆղանական ուժերի հետ բախումների ժամանակ: Այս մասին հայտնել է աֆղանական Ariana News հեռուստաալիքը՝ հղում անելով իր աղբյուրներին։ Ըստ նրանց տվյալների՝ միջադեպը տեղի է ունեցել երկուշաբթի գիշերը։ Նշվում է, որ բախումները սկսվել են պակիստանցի զինվորականների կրակոցներից հետո, որոնց հետևանքով աֆղան երեխա է սպանվել։ Հեռուստաալիքը նշում է, որ մարտից հետո Աֆղանստանի զինծառայողները առգրավել են որոշակի քանակությամբ թեթև և ծանր սպառազինություն։ Փետրվարի 26-ի երեկոյան Պակիստան-Աֆղանստան սահմանին վերսկսվել են մարտական գործողությունները: Քաբուլը հայտարարել է, որ ռազմական գործողություն է իրականացնում՝ ի պատասխան Աֆղանստանի տարածքում Պակիստանի կողմից իրականացված օդային հարվածների: Պակիստանի պաշտպանության նախարար Խավաջա Ասիֆը հայտարարել է, որ իր երկիրը և Աֆղանստանում գտնվող «Թալիբան» շարժման կառավարությունն այժմ գտնվում են բաց զինված հակամարտության մեջ:
