ԱՄՆ պաշտպանության նախարարությունը 30 ամերիկյան համալսարանների կարգադրել է աուդիտ անցկացնել հիմնականում չինական համալսարանների և ռազմական ուսումնական հաստատությունների հետ ունեցած համագործակցությունների վերաբերյալ։ Պենտագոնի պահանջի համաձայն՝ համալսարանները երկու շաբաթվա ընթացքում պետք է վերանայեն այդ համագործակցությունները և դադարեցնեն խնդրահարույց համարվող պայմանավորվածությունները։ Հակառակ դեպքում նրանք կարող են զրկվել պետական ֆինանսավորումից։ Ըստ Պենտագոնի՝ նպատակն է պաշտպանել ԱՄՆ կառավարության կողմից ֆինանսավորվող հետազոտությունները հնարավոր գողությունից և չարաշահումից։ Համալսարանների անունները պաշտոնապես չեն հրապարակվել։ Սակայն ԱՄՆ անանուն աղբյուրի համաձայն՝ ցանկում ներառված են Հարվարդի համալսարանը, Մասաչուսեթսի տեխնոլոգիական ինստիտուտը (MIT) և Ջոնս Հոփքինսի համալսարանը։ Ամերիկյան կրթության խորհրդի ներկայացուցիչ Սառա Սպրայցերը մտահոգություն է հայտնել, որ Պենտագոնի հայտարարությունը կարող է տպավորություն ստեղծել, թե համալսարանները ներգրավված են անօրինական գործունեության մեջ՝ առանց դրա վերաբերյալ որևէ ապացույց ներկայացնելու։ Պենտագոնի այս քայլը հաջորդում է անցած ամիս հրապարակված թարմացված ցանկին, որտեղ ներառված են 130 օտարերկրյա հաստատություններ։ ԱՄՆ պաշտպանության նախարարությունը պնդում է, որ դրանց գործունեությունը կարող է մեծացնել ԱՄՆ կառավարության կողմից ֆինանսավորվող հետազոտությունների և մշակումների յուրացման վտանգը։
