ԱՄՆ Կոնգրեսի դեմոկրատները քննարկում են ԱՄՆ նախագահ Դոնալդ Թրամփի դեմ դատական հայց ներկայացնելու հնարավորությունը, եթե Սպիտակ տան ղեկավարը որոշի շարունակել Իրանի հետ հակամարտությունը մայիսի 1-ից հետո՝ առանց օրենսդիր մարմնի հաստատման, հաղորդում է Time ամսագիրը՝ հղում անելով իր աղբյուրներին։ Մայիսի 1-ին լրանում է 60-րդ օրը այն պահից, երբ Դոնալդ Թրամփը տեղեկացրել է ԱՄՆ Կոնգրեսին Իրանի դեմ ռազմական գործողություն սկսելու մասին, որը մեկնարկել է փետրվարի 28-ին։ Այդ ժամկետի ավարտից հետո նա օրենքով պարտավոր կլինի կամ ստանալ օրենսդիրների հավանությունը ռազմական գործողությունները շարունակելու համար, կամ գրավոր հաստատել, որ զորքերի անվտանգ դուրսբերման համար անհրաժեշտ է ևս 30 օր։ «Ներքին քննարկումները (դատական հայց ներկայացնելու վերաբերյալ – խմբ.), որոնց մասին նախկինում չի հաղորդվել, օրենսդիրների հաղորդմամբ՝ դեռ գտնվում են վաղ փուլում, սակայն կարող են ակտիվանալ առաջիկա շաբաթների ընթացքում, եթե նախագահը մայիսի 1-ին լրացող 60-օրյա կրիտիկական ժամկետից հետո շարունակի ռազմական գործողությունը»,- գրում է հրատարակությունը։
