Ուկրաինայի նախագահ Վոլոդիմիր Զելենսկին հայտնել է, որ հեռախոսազրույց է ունեցել ԱՄՆ նախագահ Դոնալդ Թրամփի հետ։ Նրա խոսքով՝ քննարկվել են բազմաթիվ հարցեր, ինչպես նաև պայմանավորվածություն է ձեռք բերվել հանդիպել Նյու Յորքում։ «Կարևոր զրույց էր, և հասցրինք քննարկել բազմաթիվ հարցեր։ Պայմանավորվեցինք հանդիպել Նյու Յորքում, և այդ հանդիպումը կարող է շատ բան փոխել։ Դիվանագիտական դինամիկան կա»,- ասել է Զելենսկին։ Նա շնորհակալություն է հայտնել Սթիվ Ուիթքոֆի և Ջարեդ Քուշների՝ Կիև կատարած այցի համար։ Զելենսկու խոսքով՝ հանդիպումների ընթացքում քննարկվել են էական մանրամասներ, և ամերիկացի ներկայացուցիչները հնարավորություն են ունեցել տեղում ծանոթանալու Ուկրաինայում ստեղծված իրավիճակին։ «Խաղաղության ուղին թիվ մեկ առաջնահերթությունն է»,- ընդգծել է Ուկրաինայի նախագահը։ Զելենսկին նշել է, որ քննարկվում են լարվածության թուլացման քայլերի և անվտանգության հիմնարար հարցերի վերաբերյալ գաղափարներ՝ ներառյալ էներգետիկ և պարենային անվտանգությունը, ինչպես նաև մարդկանց կյանքի պաշտպանությունը։ «Աշխատում ենք ամերիկյան թիմի հետ և պատրաստ ենք իսկապես լուրջ քայլերի»,- ասել է նա։ Զելենսկին նաև շնորհակալություն է հայտնել Թրամփին՝ «Լինդսի Գրեհեմի օրենքն» ստորագրելու համար՝ ընդգծելով, որ «խաղաղությունը պետք է լինի»։
