Ռուսաստանի Դաշնության արտաքին գործերի նախարարությունը կրկին զգուշացրել է օտարերկրյա քաղաքացիներին, այդ թվում՝ դիվանագիտական առաքելությունների աշխատակիցներին՝ չմնալ Կիևում և չճանապարհորդել այդ երկիր, չգտնվել Ուկրաինայի ռազմական օբյեկտների մոտակայքում։ Այդ մասին նշված է ՌԴ ԱԳՆ պաշտոնական կայքում զետեղված հայտարարության մեջ։ «Ռուսական կողմն ավելի վաղ հորդորել էր Կիևում գտնվող օտարերկրյա քաղաքացիներին և դիվանագետներին լքել քաղաքը և զերծ մնալ Ուկրաինա այցելելուց, ինչպես նաև խորհուրդ էր տվել երկրի բնակիչներին հեռու մնալ ռազմական և վարչական ենթակառուցվածքային օբյեկտներից։ Այս նախազգուշացումը տեղ էր գտել Ռուսաստանի արտաքին գործերի նախարարության՝ 2026 թվականի մայիսի 25-ի հայտարարության և օտարերկրյա գործընկերներին ուղղված դիվանագիտական նոտաների մեջ, ինչպես նաև վերստին հնչեցվել էր ՌԴ արտաքին գործերի նախարարի տեղակալ Մ. Յու. Գալուզինի կողմից՝ 2026 թվականի մայիսի 27-ին դիվանագիտական կորպուսի համար անցկացված ճեպազրույցի ընթացքում»,-ասված է հայտարարության մեջ։ Նշվում է, որ բազմաթիվ երկրների՝ այդ թվում՝ ԱՄՆ-ի, Մեծ Բրիտանիայի, ԵՄ անդամ պետությունների, Նորվեգիայի և Շվեյցարիայի իշխանությունները բազմիցս խորհուրդ են տվել իրենց քաղաքացիներին զերծ մնալ Ուկրաինա մեկնելուց. նմանատիպ վերջին զգուշացումը հրապարակվել է ընթացիկ տարվա օգոստոսին։ «Հարկ է նշել, որ ոչ բոլորն են հետևել այդ զգուշացումներին, և ոմանք գիտակցաբար իրենց մահացու վտանգի են ենթարկում։ Կիևում շարունակում են գործել բազմաթիվ դեսպանատներ, իսկ օտարերկրյա պաշտոնյաներն այցելություններով մեկնում են Ուկրաինա։ Ռուսաստանի արտաքին գործերի նախարարությունը կրկին զգուշացնում է օտարերկրյա քաղաքացիներին, այդ թվում՝ դիվանագիտական առաքելությունների աշխատակիցներին, չմնալ կամ չճանապարհորդել Ուկրաինայում։ Հնարավոր բացասական հետևանքների համար պատասխանատվությունն ամբողջությամբ ընկնում է նրանց վրա, ովքեր անտեսում են այս նախազգուշացումը»,-նշված է հայտարարության մեջ։
