Իրանի արտաքին գործերի նախարար Աբբաս Արաղչին հայտարարել է, որ ԱՄՆ-ի կողմից հրադադարի ռեժիմի վերջին խախտումները և Պարսից ծոցում իրականացված սադրիչ գործողությունները ուժեղացրել են Վաշինգտոնի դրդապատճառների և նրա դիվանագիտական քայլերի լրջության վերաբերյալ կասկածները։ Ինչպես հայտնում է Tasnim գործակալությունը, Արաղչին այս դիտարկումներն արել է ուրբաթ օրը իր թուրք գործընկեր Հաքան Ֆիդանի հետ ունեցած հեռախոսազրույցի ընթացքում, որի ժամանակ կողմերը քննարկել են տարածաշրջանային հիմնական իրադարձությունները։ Հեռախոսազրույցի ընթացքում Իրանի արտգործնախարարը Ֆիդանին տեղեկացրել է այն դիվանագիտական ջանքերի և նախաձեռնությունների մասին, որոնք ուղղված են ԱՄՆ-ի և Իսրայելի կողմից պարտադրված ագրեսիվ պատերազմի վերջնական դադարեցմանը։ Գործակալությունը նշում է, որ անդրադառնալով Պարսից ծոցում ԱՄՆ-ի վերջին սադրիչ գործողություններին և ամերիկացի բարձրաստիճան պաշտոնյաների վիրավորական հռետորաբանությանը՝ Արաղչին ասել է. «ԱՄՆ զինված ուժերի վերջին լարվածություն հրահրող քայլերն ու հրադադարի ռեժիմի պարբերական խախտումները խորացրել են դիվանագիտության նկատմամբ ամերիկյան կողմի մտադրությունների և հանձնառության վերաբերյալ իրենց կասկածները»։ Նա ԱՄՆ-ի մոտեցումը բնութագրել է որպես դեստրուկտիվ և հայտարարել, որ այն հարվածում է դիվանագիտական գործընթացին՝ միաժամանակ մեծացնելով Վաշինգտոնի մտադրությունների նկատմամբ իրանցի ժողովրդի անվստահությունը։ Արաղչին նաև նշել է, որ ագրեսիայի ապօրինի գործողությունների դադարեցումը և հակառակ կողմի ծայրահեղական ու անտրամաբանական մոտեցումներից հրաժարվելը անհրաժեշտ պայմաններ են ընթացիկ դիվանագիտական գործընթացն առաջ մղելու համար։ Իր հերթին, Ֆիդանն ընդգծել է պատերազմը դադարեցնելուն ուղղված դիվանագիտական ջանքերը շարունակելու անհրաժեշտությունը և վերահաստատել, որ Թուրքիան պատրաստ է աջակցել այդ ուղղությամբ ընթացող գործընթացներին:
