Ցանցային հետազոտությունների ինստիտուտի տնօրեն, քաղաքագետ Գագիկ Հարությունյանի կարծիքով՝ դժվար չէ պատկերացնել, թե ինչ է սպասվելու Հայաստանին իշխանության վերարտադրության արդյունքում։ «Ստացվում է, որ Հայաստանի Հանրապետությունն այս ճանապարհով վերածվելու է թուրք-ադրբեջանական վիլայեթի, այսինքն՝ բազմիցս եմ ասել, որ հիմա գնում է հիբրիդային ոճով կատարվող ցեղասպանություն։ Ադրբեջանն ու Թուրքիան հանդիսանում են այն զենքը, որն օգտագործվում է մեր դեմ։ Այս ամենի նպատակը պարզից էլ պարզ է՝ ոչնչացնել Հայաստանը։ Սա է նրանց ստրատեգիական նպատակը, և կանեն, եթե այս օրերին մեզ չհաջողվի իրավիճակ փոխել»,- 168.am -ի հետ զրույցում ասաց Գագիկ Հարությունյանը՝ խոսելով Հայաստանում իշխանությունների վերարտադրության և դրա հետևանքով Հայաստանին սպասվող վտանգավոր զարգացումների մասին։ Ըստ նրա, Հայաստանն իր պատմության մեջ երբեք նմանօրինակ դավաճան իշխանություն չի ունեցել, եղել են առանձին իշխաններ, որոնք «տարբեր նպատակներով ու նկատառումներով սրիկայություններ են արել», ներկայիս իշխանությունն իր տեսակի մեջ բացառիկ է։ «Դիտարկելով այս ամբողջ գործընթացները՝ կարող եմ ասել՝ մեր երկիրը լավ ճանապարհով չի գնալու, հասկանալի է, այս ղեկավարություն կոչվածն ավելի է ցինիկանալու, նրա ձեռքերն ազատվել են՝ եթե հաջողվի վերջնարդյունքում գրանցել հաղթանակ»,- հավելեց մեր զրուցակիցը։
