ՄԱԿ-ի գլխավոր քարտուղար Անտոնիու Գուտերեշը խորը մտահոգություն է հայտնել Մերձավոր Արևելքում էսկալացիայի նոր ալիքի կապակցությամբ և բոլոր կողմերին կոչ արել ցուցաբերել առավելագույն զսպվածություն ու հարգել հրադադարի ռեժիմը։ Այս մասին նշված է ՄԱԿ-ի գլխավոր քարտուղարի փոխխոսնակ Ֆարհան Հաքի տարածած հայտարարության մեջ։ Փաստաթղթում ընդգծվում է, որ Գուտերեշը հորդորում է անհապաղ դադարեցնել հարձակումները, զերծ մնալ իրավիճակն էլ ավելի սրող քայլերից և գործել առավելագույն զգուշավորությամբ՝ հաշվի առնելով տարածաշրջանում առկա առանց այն էլ անկայուն իրադրությունը։ Նա նաև շեշտել է Լիբանանում, Իրանում և Գազայի հատվածում հրադադարի ռեժիմների լիակատար պահպանման կարևորությունը և կոչ արել զերծ մնալ այնպիսի գործողություններից, որոնք կարող են տապալել լարվածության նվազեցմանն ուղղված դիվանագիտական ջանքերը։
