Թուրքիայի նախագահի արտաքին քաղաքականության և անվտանգության հարցերով գլխավոր խորհրդական Ակիֆ Չագաթայ Քըլըչը հանդիպել է Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Մագդալենա Գրոնոյի հետ։ Ըստ ԱՊԱ-ի թուրքական բյուրոյի՝ Քըլըչը այս մասին գրել է «X»-ում։ Հանդիպման ընթացքում քննարկվել են Ադրբեջանի և Հայաստանի միջև խաղաղության գործընթացը, Թուրքիայի և Հայաստանի միջև հարաբերությունների կարգավորումը, Հարավային Կովկասում իրականացվելիք նախագծերը, տարածաշրջանային կայունության և անվտանգության հարցերը, ինչպես նաև Եվրամիության մոտեցումը տարածաշրջանին։ Միևնույն ժամանակ ընդգծվել է Հարավային Կովկասում խաղաղության, կայունության և համագործակցության ամրապնդմանն ուղղված համատեղ ջանքերի կարևորությունը։
