«Amazon»-ի ցածր երկրամերձ ուղեծրի արբանյակային ինտերնետային նախագիծը՝ «Amazon Leo»-ն, համագործակցության համաձայնագիր է ստորագրել Հարավային Աֆրիկայի «Herotel» ընկերության հետ՝ երկրի թերսպասարկվող գյուղական բնակավայրերում լայնաշերտ ինտերնետի հասանելիությունն ընդլայնելու նպատակով։ Հարավային Աֆրիկայի խոշորագույն ինտերնետ մատակարարներից մեկը՝ «Herotel»-ը, կօգտագործի «Amazon Leo»-ի արբանյակային տեխնոլոգիան՝ «evry» անվանումով նոր ծառայություն գործարկելու համար։ Բնակելի բաժանորդների համար ծառայության առևտրային մեկնարկը նախատեսվում է 2027 թվականին։ Գործարքը կնքվում է այն ժամանակ, երբ արբանյակային ինտերնետի մատակարարները ձգտում են ընդլայնել իրենց ներկայությունը Աֆրիկայում։ «SpaceX»-ի «Starlink»-ը նույնպես հետաքրքրված է հարավաֆրիկյան շուկայով, սակայն առայժմ սպասում է լիցենզավորման կանոնների փոփոխությանը։ Առաջարկվող բարեփոխումները կարող են օտարերկրյա արբանյակային օպերատորներին հնարավորություն տալ բավարարել տեղական սեփականատիրության և տնտեսական ներառման պահանջները՝ բաժնեմասնակցության այլընտրանքային մեխանիզմների միջոցով։ «Amazon Leo»-ն և «Herotel»-ը հայտարարում են, որ իրենց համագործակցությունը կօգնի հաղթահարել Հարավային Աֆրիկայում ինտերնետային կապի երկարամյա խնդիրները։ Երկրի միլիոնավոր բնակիչներ, հատկապես ֆերմաներում, փոքր քաղաքներում և գյուղական համայնքներում, մինչ օրս զրկված են հուսալի ինտերնետից, քանի որ օպտիկամանրաթելային և ֆիքսված անլար ցանցերի կառուցումը նման տարածքներում հաճախ տնտեսապես շահավետ չէ։ Համագործակցության ֆինանսական պայմանները չեն հրապարակվել։
