FIFA-ի նախագահ Ջաննի Ինֆանտինոյի՝ Աշխարհի առաջնությունների կառավարման համար նոր՝ 20 միլիարդ դոլար գնահատվող ընկերություն ստեղծելու ծրագիրը բուռն քննադատության է արժանացել Եվրոպական ֆուտբոլային ասոցիացիաների կողմից։ Ըստ ծրագրի՝ նոր կառույցը՝ FIFA Forward Enterprise (FFE) անվամբ, պետք է դառնա FIFA-ի առևտրային ստորաբաժանումը և կառավարի այնպիսի խոշոր մրցաշարեր, ինչպիսիք են աշխարհի առաջնությունը և ակումբային աշխարհի առաջնությունը։ Սակայն նախաձեռնությունը կոշտ արձագանքի է արժանացել UEFA-ի կողմից։ Եվրոպական ֆուտբոլային կառույցը հայտարարել է, որ FIFA-ն իրավունք չունի վաճառել այն, ինչ իրեն չի պատկանում։ «Դա FIFA-ինը չէ, որպեսզի վաճառի։ Մեզանից ոչ ոք ֆուտբոլի սեփականատերը չէ», – հայտարարել է UEFA-ն։ Ֆուտբոլային կառույցների միջև առաջացած տարաձայնությունը վերաբերում է ոչ միայն ֆինանսական հարցերին, այլև այն հարցին, թե ով պետք է վերահսկի համաշխարհային ֆուտբոլի ամենամեծ մրցաշարերի ապագան։
