Մեքսիկայում ձերբակալվել է «Կարտել դե լոս Ռեյես» հանցավոր խմբավորման առաջնորդ Ալֆոնսո Ֆերնանդես Մագալյոնը, որի հայտնաբերման համար ԱՄՆ իշխանությունները 5 միլիոն դոլար պարգևավճար էին սահմանել։ Գործողությունն իրականացվել է բանակի, Ազգային գվարդիայի և ռազմածովային ուժերի մասնակցությամբ։ Մագալյոնին մեղադրանք է առաջադրվել մարդկանց ապօրինի ազատազրկման, ապստամբության, շորթման, թմրավաճառության, ինչպես նաև զինվորականների վրա անօդաչուներով հարձակումներ կազմակերպելու համար։ Նրա հետ միասին ձերբակալվել է ևս երկու անձ, առգրավվել են զենք ու թմրանյութեր։ Ձերբակալությունից ժամեր անց կարտելի ենթադրյալ անդամները փորձել են խոչընդոտել նրանց տեղափոխմանը՝ մեքենաներ հրկիզելով և փակելով Միչոական նահանգի մի քանի ավտոճանապարհներ, սակայն ուժայինները վերականգնել են երթևեկությունը։
