Սննդամթերքի անվտանգության տեսչական մարմնի տեսուչները վերահսկողական միջոցառում են իրականացրել Տավուշի մարզի Բերդավան բնակավայրում գործող՝ անհատ ձեռնարկատեր Արայիկ Նավասարդյանին պատկանող ոչ ալկոհոլային գազավորված ըմպելիքների արտադրամասում։ Ինչպես տեղեկանում է Սննդամթերքի անվտանգության տեսչական մարմնից, ստուգման ընթացքում հայտնաբերվել են սանիտարահիգիենիկ նորմերի մի շարք խախտումներ, որոնց հիմքով արտադրամասի գործունեությունը կասեցվել է։ Մասնավորապես, արտադրամասի պատերի մակերևույթները պատրաստված չեն եղել անջրանցիկ, լվացվող և ախտահանվող նյութերից։ Խախտումներ են արձանագրվել նաև դռների և պատուհանների մասով․ դռները եղել են անհարթ և չեն ունեցել չներծծող մակերես, իսկ բացվող ներքին պատուհանները չեն ունեցել հեշտությամբ հանվող և մաքրվող միջատապաշտպան ցանցեր։ Արտադրամասի գործունեությունը կասեցվել է մինչև արձանագրված խախտումների ամբողջական վերացումը։
