Նեպալում և Չինաստանի Տիբեթի ինքնավար շրջանում տեղի ունեցած աղետալի հեղեղների հետևանքով զոհերի թիվը հասել է 474-ի, ավելի քան 1500 մարդ համարվում է անհետ կորած։ Նեպալի իշխանությունների տվյալներով՝ երկրում զոհվել է 469 մարդ, իսկ 3253 մարդ ուղղաթիռներով տարհանվել է աղետի գոտուց։ Տուժածներին տեղափոխել են հիվանդանոցներ, Կատմանդու և այլ վայրեր։ Չինական կողմում զոհերի թիվը հասել է հինգի։ Չինաստանի պետական լրատվամիջոցներն ավելի վաղ հայտնել էին 558 անհետ կորածի մասին, իսկ Նեպալի աղետների կառավարման մարմինը՝ 977։ Իշխանությունները զգուշացնում են, որ լիճը վարարել է և կարող է նոր ջրհեղեղի պատճառ դառնալ։ Գիտնականները, ուսումնասիրելով արբանյակային պատկերները, պարզել են, որ Հիմալայների բարձրադիր հատվածում սառցադաշտի տակ գտնվող ապարների փլուզումը սեյսմիկ ցնցում է առաջացրել։ Փլուզված ապարներն ու հալված ջուրը լցվել են հովիտների գետերը՝ առաջացնելով հսկայական ջրի հոսք, որը Տիբեթում և Նեպալում քշել է շենքեր, կամուրջներ և հող։
