ԱՄՆ նախագահ Դոնալդ Թրամփը, ենթադրաբար, Սպիտակ տան չորս օգնականների նկատմամբ բավական առատաձեռն է գտնվել նվերների հարցում՝ նրանցից երեքին տալով 45 000 դոլարի չափով գումար, մեկին՝ 20 000։ Աս մասին հաղորդում է The Associated Press գործակալությունը՝ վկայակոչելով վարչակազմի հրապարակած նոր ֆինանսական հայտարարագրերը։ Սպիտակ տան գործադիր օգնական Նատալի Հարփը, հաղորդակցության հարցերով խորհրդական Մարգո Մարտինը և Օվալաձև աշխատասենյակի գործառնությունների փոխտնօրեն Չեմբերլեյն Հարիսը որպես նվեր ստացել են 45 000-ական դոլար, իսկ Օվալաձև աշխատասենյակի գործառնությունների տնօրեն Ուոլթ Նաուտան՝ 20 000 դոլար. դրանք նշվել են աշխատակազմի տարեկան ֆինանսական հայտարարագրերի ձևաթղթերում, որոնք վարչակազմը հրապարակել է անցյալ շաբաթ։ Աշխատավարձի հայտարարագրման զեկույցի համաձայն՝ Հարփը, Մարտինը և Հարիսը տարեկան վաստակում են 150 000 դոլար, իսկ Նաուտան՝ տարեկան 175 000 դոլար։ Սպիտակ տան մի պաշտոնյա, որը լիազորված չէր հրապարակայնորեն մեկնաբանել այս հարցը և խոսել է անանունության պայմանով, հայտնել է, որ Թրամփը «երկարատև պրակտիկա ունի Սուրբ ծննդյան նվերներ նվիրելու իր շրջապատի մարդկանց, այդ թվում՝ երբեմն աշխատակիցներին և օգնականներին, թե՛ կառավարությունում, թե՛ մասնավոր հատվածում իր աշխատանքային գործունեության ընթացքում»։ Պաշտոնյան չի նշել՝ արդյոք նախագահի կողմից նմանատիպ նվերներ են ստացել այլ աշխատակիցներ ևս, սակայն հավելել է, որ դրամական նվերները կապված չեն եղել անհատների պաշտոնական պարտականությունների հետ և, հետևաբար, «լիովին թույլատրելի են համապատասխան իրավական և էթիկական չափանիշներով»։ Այս նվերների մասին առաջինը հայտնել է The Washington Post-ը սեպտեմբերի 8-ին։
