Անցած ամիս Չինաստանում անցկացված Մարդանման ռոբոտների համաշխարհային խաղերի ժամանակ ռոբոտները ցատկում էին, բռնցքամարտ վարում և պարում։ Որոշ արագաշարժ ռոբոտներ 100 մետր տարածությունը հաղթահարել են նույնիսկ ավելի արագ, քան Ուսեյն Բոլտը։ Հանդիսատեսը ոգևորությամբ հետևում էր մեքենաների զարգացող հնարավորություններին, ինչպես նաև նրանց զվարճալի անկումներին, որոնք սոցիալական ցանցերում մեմերի էին վերածվում։ Խաղերի ավարտից երկու օր անց Չինաստանի Ժողովրդա-ազատագրական բանակի պաշտոնական թերթը հետազոտողներին կոչ է արել արագացնել առաջադեմ տեխնոլոգիաների տեղափոխումը լաբորատորիաներից ռազմական ուսումնական դաշտեր՝ ռոբոտացված «մարտական ռոբոտների» ստեղծման նպատակով։ Reuters-ը գրում է, որ Չինաստանի պաշտպանական գերատեսչությունն արագացնում է մարդանման ռոբոտների ռազմական կիրառման ուղղությամբ իրականացվող հետազոտությունները և դիտարկում դրանց հնարավոր օգտագործումը պատերազմի ժամանակ։ Նախկինում չհրապարակված տվյալների համաձայն՝ ռազմական հաստատություններում մարդանման ռոբոտների փորձարկումներ են իրականացվում՝ դրանք մարտի դաշտի պահանջներին համապատասխանեցնելու նպատակով։ Միաժամանակ ուսումնասիրվում են ռոբոտներ և դրանց ուսուցման տեխնոլոգիաներ ձեռք բերելու հնարավորությունները, ինչպես նաև այն հարցը, թե ինչպես կարող են այդ սարքերը գործել զինվորական ստորաբաժանումների հետ համատեղ։ Այս ուղղությամբ աշխատանքները հատկապես ակտիվացել են 2025 և 2026 թվականներին՝ հիմնականում կենտրոնանալով ռոբոտների շրջակա միջավայրի ընկալման, առարկաների կառավարման և մանիպուլյացիայի, ինչպես նաև արհեստական բանականության ուսուցման համար անհրաժեշտ տվյալների վրա։
