Ֆրանսիայի հարավում Ռենուարի թանգարանից գողացված երկու կտավի արժեքը գնահատվում է շուրջ 9 միլիոն եվրո, սակայն դրանց գողությունը կարող է ամենևին էլ շահավետ չլինել հանցագործների համար։ Արվեստի հանցագործությունների մասնագետների խոսքով՝ հանրահայտ և գողացված կտավների վաճառքը գրեթե անհնար է։ Դրանք չափազանց ճանաչելի են, իսկ ցանկացած լուրջ աճուրդի տուն կամ օրինական գնորդ անմիջապես կարող է կասկածել դրանց ծագմանը։ Այսինքն՝ միլիոնավոր եվրոներ արժողությամբ նկարները թանգարանից դուրս հայտնվելուց հետո կարող են գործնականում զրոյական արժեք ունենալ կամ վաճառվել իրական արժեքի միայն չնչին մասով։ Նույնիսկ ստվերային շուկայում նման ստեղծագործությունների արժեքը կտրուկ նվազում է։ Ի տարբերություն որոշ այլ թանկարժեք իրերի, օրինակ՝ զարդերի, կտավները հնարավոր չէ բաժանել մասերի և առանձին վաճառել՝ առանց դրանց ամբողջական արժեքը կորցնելու։ Արվեստի հանցագործությունների մասնագետները նշում են, որ պոտենցիալ գնորդների մեծ մասը պարզապես չի ցանկանում ստանձնել նման գործարքի հետ կապված ռիսկերը։ Ֆրանսիական Ռիվիերայում՝ Կանյ-սյուր-Մեր քաղաքում գտնվող Ռենուարի թանգարանից երեքշաբթի կատարված գողությունը արվեստի հայտնի հավաքածուների դեմ ուղղված վերջին խոշոր հանցագործություններից է։ Մասնագետները զգուշացնում են, որ նման դեպքերը կարող են շարունակվել։ Որտե՞ղ կարող են հայտնվել Ռենուարի կտավները Արվեստի հանցագործությունների մասնագետ Էրին Թոմփսոնի գնահատմամբ՝ նման գողությունից շահույթ ստանալու հավանականությունը «չափազանց ցածր է»։ Եթե գողացված արվեստի գործը չվերադարձվի կամ չհայտնաբերվի, այն կարող է տարիներ շարունակ մնալ թաքցված։ Որոշ դեպքերում, ըստ Թոմփսոնի, գողերը նույնիսկ կարող են ոչնչացնել այն՝ հանցագործության հետքերը վերացնելու նպատակով։ Այնուամենայնիվ, Արթուր Բրանդը, որը արվեստի գողությունների հետաքննությունների ընթացքում պարբերաբար համագործակցում է իրավապահների հետ, ասում է, որ հանդիպել է դեպքերի, երբ գողացված կտավները հայտնվել են քրեական աշխարհի շրջանառության մեջ։ Դրանք երբեմն կարող են օգտագործվել որպես մասնակի վճարում, օրինակ՝ թմրանյութերի դիմաց։ Մեկ այլ հնարավոր տարբերակ է գողացված արվեստի գործը որպես «սակարկության միջոց» օգտագործելը։
