ԱՄՆ-ը պետք է դադարեցնի տիեզերքում սպառազինությունների կուտակումը և ռազմական գործողությունների նախապատրաստումը։ Ինչպես հայտնում է ՏԱՍՍ-ը, այս մասին ճեպազրույցի ժամանակ հայտարարել է Չինաստանի արտաքին գործերի նախարարության պաշտոնական ներկայացուցիչ Գո Ցզյակունը։ Նշվում է, որ սեպտեմբերի 14-ին ԱՄՆ ռազմաօդային ուժերի նախարար Թրոյ Մեյնքը հայտարարել է, որ Վաշինգտոնն ունի տիեզերական ուղեծրային սպառազինություն՝ տիեզերական տարածքը վերահսկելու համար։ «Մենք կոչ ենք անում ամերիկյան կողմին դադարեցնել տիեզերքում սպառազինությունների կուտակումն ու ռազմական գործողությունների նախապատրաստումը և կոնկրետ քայլերով պահպանել գլոբալ ռազմավարական կայունությունը», – ասել է դիվանագետը։ Գո Ցզյակունը նշել է, որ Պեկինը հանդես է գալիս տիեզերքի խաղաղ օգտագործման օգտին և դեմ է դրա ռազմականացմանը, ռազմադաշտի վերածելուն ու սպառազինությունների մրցավազքին։
