Ուկրաինական իշխանությունների տվյալներով՝ սեպտեմբերի 18-ին Ռուսաստանի իրականացրած հարվածների հետևանքով մեկ մարդ զոհվել, առնվազն 21-ը՝ վիրավորվել է։ Ռուսաստանի պաշտպանության նախարարությունն իր հերթին հայտնել է նույն օրը 328 ուկրաինական անօդաչու թռչող սարք խոցելու մասին։ Ուկրաինական «Սուսպիլնե» հանրային հեռարձակողը, վկայակոչելով Խարկովի մարզի դատախազությանը և տեղական իշխանություններին, հայտնել է, որ մերձքաղաքային էլեկտրագնացքին անօդաչու թռչող սարքով հարվածի հետևանքով մեկ մարդ զոհվել, ութը վնասվածքներ են ստացել։ Հարվածից երկու վագոնում հրդեհ է բռնկվել։ Օդեսայի մարզային ռազմական վարչակազմի տվյալներով՝ քաղաքի կենտրոնին հասցված երկու հաջորդական հարվածների հետևանքով տուժել է 11 մարդ։ Վարչակազմի հաղորդագրությունը վկայակոչող «Ուկրաինսկայա պրավդա»-ն նշել է, որ երկրորդ հարվածը տեղի է ունեցել դեպքի վայրում փրկարարների աշխատանքի ընթացքում։ Կիևի մարզային ռազմական վարչակազմը հայտնել է ևս երկու վիրավորի մասին։ «Ուկրաինսկայա պրավդա»-ի փոխանցմամբ՝ Բուչայի շրջանում երկու տղամարդ բեկորային վնասվածքներով տեղափոխվել է հիվանդանոց։ Հարձակման հետևանքով հրդեհ է բռնկվել պահեստային տարածքում, պահեստներ են վնասվել նաև Բորիսպոլի շրջանում։ Ուկրաինայի զինված ուժերի ռազմաօդային ուժերը սեպտեմբերի 19-ի առավոտյան հայտնել են, որ ռուսական հարվածային և ռեակտիվ անօդաչուներ են արձանագրվել Կիևի, Չեռնիգովի, Դնեպրոպետրովսկի, Նիկոլաևի, Օդեսայի և այլ մարզերի ուղղությամբ։ Հաղորդվել է նաև Խարկովի մարզի հյուսիսային հատվածում կառավարվող ավիառումբերի կիրառման վտանգի մասին։ Ռուսաստանի պաշտպանության նախարարության պաշտոնական հաղորդագրության համաձայն՝ սեպտեմբերի 18-ին՝ Մոսկվայի ժամանակով ժամը 08:00-20:00-ն, ռուսական հակաօդային պաշտպանության միջոցները խոցել են 328 ուկրաինական անօդաչու։ Գերատեսչության պնդմամբ՝ դրանք հայտնաբերվել են Ռուսաստանի մի շարք շրջանների, ինչպես նաև Սև և Կասպից ծովերի տարածքում։ Ռուսաստանի պաշտպանության նախարարությունը նաև հայտարարել է ուկրաինական նավահանգիստների և նավերի ուղղությամբ հարվածների մասին՝ պնդելով, որ դրանք օգտագործվել են Ուկրաինայի զինված ուժերի կարիքների համար։
