Իտալիայի կառավարությունը առաջիկայում նախարարների խորհրդի քննարկմանը կներկայացնի դպրոցներին վերաբերող նոր միջոցառումներ, որոնցով նախատեսվում է սահմանափակել մեկ դասարանում օտարերկրյա աշակերտների թիվը և դպրոցներում արգելել նիկաբի ու բուրկայի կրումը։ Այս մասին Հռոմում՝ իր «Իտալիայի եղբայրներ» կուսակցության երիտասարդական թևի միջոցառման ժամանակ, հայտարարել է Իտալիայի վարչապետ Ջորջա Մելոնին։ Իտալական Corriere della Sera-ի հաղորդմամբ՝ այս երկու փոփոխությունները նախատեսվում է ներառել դպրոցների վերաբերյալ դեկրետում, որը կառավարությունը մտադիր է քննարկել նախարարների խորհրդի՝ այս շաբաթվա վերջին կայանալիք նիստում։ Մելոնին հայտարարել է, որ անընդունելի է այն իրավիճակը, երբ իտալական դպրոցներում իտալացի երեխաները կարող են իրենց փոքրամասնություն զգալ։ Նրա խոսքով՝ օտարերկրյա աշակերտների ծնողները, որոնց երեխաները դժվարություններ ունեն Իտալիայում ինտեգրվելու հարցում, նույնպես պետք է սովորեն իտալերեն։ Քննարկվող փոփոխությունների համաձայն՝ մեկ դասարանում օտարերկրյա աշակերտների թիվը կարող է սահմանափակվել 30 տոկոսով։ Սակայն այս սահմանափակումը չի տարածվի Եվրամիության անդամ մյուս երկրների քաղաքացիների վրա, քանի որ ԵՄ կանոնների համաձայն՝ նրանք կրթական համակարգում հավասարեցվում են Իտալիայի քաղաքացիներին։
