ԱՄՆ-ի հյուսիս-արևելքում տասնյակ միլիոնավոր մարդիկ հայտնվել են հզոր «նորէասթ» փոթորկի ազդեցության գոտում։ Փոթորիկը առաջացրել է ափամերձ ջրհեղեղներ, ուժեղ քամիներ, հորդառատ անձրևներ, էլեկտրաէներգիայի անջատումներ և տրանսպորտային լուրջ խափանումներ։ ԱՄՆ Ազգային եղանակային ծառայությունը (NWS) Նյու Յորքի և Բոստոնի շրջանում զգուշացրել է վտանգավոր ափամերձ հեղեղումների և եղանակային ծանր պայմանների մասին։ Նյու Յորքում և Նյու Ջերսիում արտակարգ դրություն է հայտարարվել։ Նյու Ջերսիի ափամերձ համայնքների, այդ թվում՝ Սերֆ Սիթիի և Մանասկուանի, փողոցներն ու բնակելի տները հեղեղվել են։ Բրուքլինում ընկած ծառի հետևանքով մեկ մարդ զոհվել է։ Նյու Յորքի իշխանությունները բնակիչներին հորդորել են խուսափել ոչ անհրաժեշտ ճանապարհորդություններից և չքայլել կամ չվարել մեքենաներ հեղեղված տարածքներով։ Փոթորկի հետևանքով ԱՄՆ-ի հյուսիս-արևելքում ավելի քան 100 հազար տնային տնտեսություն մնացել է առանց էլեկտրականության։ Միաժամանակ, FlightAware-ի տվյալներով, ավելի քան 2400 չվերթ հետաձգվել է, իսկ 1199-ը՝ չեղարկվել։ Եղանակային պայմանների պատճառով չեղարկվել է նաև Էդ Շիրանի՝ Բոստոնի Gillette Stadium-ում նախատեսված համերգը։ Մարզադաշտի ղեկավարությունը հայտնել է, որ որոշումը կայացվել է անվտանգության նկատառումներով։ Օդերևութաբանները կանխատեսում են, որ շաբաթվա լիալուսինը կարող է ավելի ուժեղացնել ափամերձ հեղեղումները։
