Սև ծովում՝ Բուլղարիայի բացառիկ տնտեսական գոտում, դրոնների հարվածներից վնասվել են երկու առևտրային նավեր՝ Տոգոյի դրոշով ALFA WATAN-ը և Պալաուի դրոշով ABLE-ը։ Հարձակումը տեղի է ունեցել հոկտեմբերի 6-ի գիշերը՝ Բյալա քաղաքից մոտ 70–80 ծովային մղոն արևելք։ Բուլղարական իշխանությունների տվյալներով՝ սա առաջին նման հարձակումն է երկրի տնտեսական գոտում գտնվող առևտրային նավերի դեմ։ ALFA WATAN-ը կրիտիկական կառուցվածքային վնասներ է ստացել և խորտակվել։ Նավի անձնակազմի ճակատագիրն առայժմ անհայտ է, և շարունակվում են որոնողափրկարարական աշխատանքները։ Երկրորդ նավի՝ ABLE-ի վրա հարվածից հետո հրդեհ է բռնկվել, ինչի հետևանքով 18 հոգանոց անձնակազմը ստիպված է եղել լքել նավը։ Նրանց, այդ թվում՝ 11 թուրք և 7 հնդիկ նավաստիների, փրկել է բուլղարական դրոշով DIOSCURIA լաստանավը։ Երկու նավաստի ծանր վնասվածքներ են ստացել։ Բուլղարիայի վարչապետ Ռումեն Ռադևը արտակարգ հանդիպում է հրավիրել պետական կառույցների և անվտանգության ծառայությունների ներկայացուցիչների մասնակցությամբ։ Նրա խոսքով՝ նավերի անձնակազմերը հաստատել են, որ հարձակման են ենթարկվել օդային և ծովային դրոնների միջոցով։ Հարձակվողների ինքնությունը դեռ պաշտոնապես չի հաստատվել։
