Առողջապահության համաշխարհային կազմակերպության տվյալներով՝ 2024 թվականին աշխարհում 5-19 տարեկան ավելի քան 170 միլիոն երեխա և դեռահաս ունեցել է ճարպակալում։ Նրանցից մոտ 70 միլիոնը 5-9 տարեկան երեխաներ են, իսկ 100 միլիոնը՝ 10-19 տարեկան դեռահասներ։ ԱՀԿ-ի տվյալներով՝ այս տարիքային խմբում ճարպակալման տարածվածությունը 1990 թվականից քառապատկվել է։ Հոկտեմբերի 7-ին ԱՀԿ-ն հրապարակել է երեխաների և դեռահասների ճարպակալման բուժման վերաբերյալ առաջին առանձին ուղեցույցները։ Կազմակերպությունը շեշտում է առողջ սննդակարգի, ֆիզիկական ակտիվության և վարքագծային միջամտությունների կարևորությունը։ ԱՀԿ-ն նաև նշում է, որ միայն բուժումը բավարար չէ ճարպակալման տարածման աճը կանգնեցնելու համար։ Կազմակերպությունը երկրներին կոչ է անում առողջ սնունդն ու ֆիզիկական ակտիվությունն ավելի հասանելի և մատչելի դարձնել։
