Jaguar-ը Նյու Յորքում ներկայացրել է իր նոր ամբողջովին էլեկտրական Type 01 մոդելը՝ ընկերության վերափոխման կարևոր փուլում։ Չորսդռնանի GT-ն մշակվել, նախագծվել և արտադրվելու է Մեծ Բրիտանիայում, իսկ արտադրությունը նախատեսվում է սկսել 2027 թվականին՝ Սոլիհալում։ Jaguar-ի տվյալներով՝ մեքենայի առավելագույն ընթացքը կարող է հասնել 450 մղոնի՝ մոտ 724 կմ-ի, իսկ հզորությունը՝ մինչև 1030 ձիաուժի։ Type 01-ի պատվերները կսկսվեն 2027 թվականի սկզբին, իսկ առաջին մեքենաների մատակարարումները նախատեսվում են նույն տարվա երկրորդ կեսին։ Մեքենան դարձել է Jaguar-ի նոր սերնդի առաջին արտադրական մոդելը և ամբողջությամբ հիմնված է ընկերության նոր էլեկտրական հարթակի վրա։ Նոր մոդելի ներկայացումը տեղի է ունենում Jaguar-ի վիճահարույց ռեբրենդինգից մոտ երկու տարի անց։ 2024 թվականին ընկերությունը փոխեց լոգոն, վերաձևավորեց հայտնի «ցատկող յագուարի» խորհրդանիշը և ներկայացրեց «Copy Nothing» ու «Delete Ordinary» կարգախոսները։ Այդ արշավը լայն քննարկումների և քննադատության արժանացավ, հատկապես այն բանից հետո, երբ հրապարակված գովազդային տեսանյութում մեքենա ընդհանրապես չէր ցուցադրվում։ Ներկայիս փուլին Jaguar-ը հասել է նաև բարդ ժամանակաշրջանից հետո․ նախորդ տարի կիբերհարձակումը մի քանի շաբաթով խափանել էր JLR-ի արտադրությունը, իսկ անցած ամիս ընկերությունը հայտարարել էր շուրջ 4000 աշխատատեղի կրճատման ծրագրի մասին։
