Բաշկիրիայում կալանավորվել են 43-ամյա մի կին և նրա 32-ամյա ծանոթը՝ 18-ամյա ուսանողուհուն առևանգելու և անազատության մեջ պահելու կասկածանքով։ Քննության վարկածով՝ նրանք փորձել են ստիպել աղջկան հոր մահվան համար ստացած գումարի մի մասը տալ մորը։ Դեպքը տեղի է ունեցել հոկտեմբերի 15-ին՝ Ստերլիտամակ քաղաքում։ Քննության տվյալներով՝ կասկածյալները զբոսայգիներից մեկում դարանակալել են աղջկան, ուժով նստեցրել մեքենան և տեղափոխել Ֆյոդորովսկի շրջանի գյուղերից մեկում գտնվող մասնավոր տուն, որտեղ նրան փակել են։ Աղջկա հայրը զոհվել էր պատերազմում։ Նրա մահվան կապակցությամբ նախատեսված ապահովագրական հատուցումը պատկանում էր դստերը, քանի որ ծնողներն արդեն ամուսնալուծված էին, իսկ մայրը, ըստ հրապարակված տեղեկությունների, այդ գումարի նկատմամբ իրավունք չուներ։ Աղջկան հաջողվել է տանը հեռախոս գտնել և զանգահարել ոստիկանություն։ Իրավապահները նրան ազատել են, իսկ կասկածյալներին՝ ձերբակալել։ Նրանց մեղադրանք է առաջադրվել մի խումբ անձանց կողմից նախնական համաձայնությամբ և բռնության գործադրմամբ մարդ առևանգելու համար՝ ՌԴ քրեական օրենսգրքի 126-րդ հոդվածի 2-րդ մասով։ Դատարանը երկուսին էլ կալանավորել է։
