168.am -ի տեղեկություններով՝ երեկ՝ մայիսի 22-ին, Արդարադատության ակադեմիայի կառավարման խորհրդի որոշմամբ Արդարադատության ակադեմիայի ռեկտոր է ընտրվել Երևանի պետական համալսարանի (ԵՊՀ) Իրավագիտության ֆակուլտետի դասախոս, Քրեական դատավարության և կրիմինալիստիկայի ամբիոնի դոցենտ Տաթևիկ Սուջյանը: Ավելի վաղ Ակադեմիայի ռեկտորի պաշտոնում 10 տարի պաշտոնավարած Սերգեյ Առաքելյանն աշխատանքից ազատման դիմում էր գրել: Մասնագիտական հանրույթը բավականին դրական է բնութագրում Տաթևիկ Սուջյանին՝ շեշտելով հատկապես նրա մասնագիտական պատրաստվածությունն ու մարդկային որակները: Սուջյանը բավականին լավ ընկալում ունի նաև ուսանողների շրջանում: 2019 թվականի փետրվարի 1-ից մինչ Արդարադատության ակադեմիայի ռեկտորի պաշտոնում ընտրվելը Տաթևիկ Սուջյանն աշխատում էր ՀՀ Վճռաբեկ դատարանի աշխատակազմի իրավական փորձաքննությունների ծառայությունում: Աշխատել է նաև Արդարադատության նախարարությունում և չնայած իր երիտասարդդ տարիքին՝ լուրջ աշխատանքային փորձառություն ունի:
