Կիրակի օրը Շվեյցարիայում տեղի կունենա հանրաքվե, որի ժամանակ քաղաքացիները պետք է որոշեն՝ արդյոք պետք է սահմանափակել երկրի բնակչության թվաքանակը։ Նախաձեռնությունն առաջարկում է մինչև 2050 թվականը վերին շեմ սահմանել 10 մլն մարդ և իշխանություններին պարտավորեցնել միջոցներ ձեռնարկել 9,5 մլն ցուցանիշին հասնելու դեպքում, հայտնում է Swissinfo-ն։ Ներկայումս երկրի բնակչությունը կազմում է մոտ 9,1 մլն մարդ։ Շվեյցարական ժողովրդական կուսակցության կողմից առաջ քաշված նախագիծը նախատեսում է զուտ ներգաղթի կրճատում։ Մասնավորապես, առաջարկվում է խստացնել մշտական բնակության իրավունքի տրամադրման կանոնները և, անհրաժեշտության դեպքում, վերանայել միջազգային համաձայնագրերը, ներառյալ ԵՄ-ի հետ ազատ տեղաշարժի մասին պայմանագիրը։ Նախագծի հակառակորդները կարծում են, որ նման միջոցները կարող են հարվածել տնտեսությանը և խարխլել հարաբերությունները Եվրամիության հետ, ինչպես նաև մեծացնել ծանրաբեռնվածությունը կենսաթոշակային համակարգի վրա՝ աշխատուժի պակասի պատճառով։ Դաշնային խորհուրդը և խորհրդարանը խորհուրդ են տվել մերժել նախաձեռնությունը։ gfs.bern ինստիտուտի հարցման տվյալներով՝ մայիսի վերջին հարցվածների 45%-ը աջակցում էր դրան, իսկ 52%-ը՝ դեմ էր արտահայտվում։ Քվեարկության վերջնական արդյունքներն ակնկալվում են հունիսի 14-ի երեկոյան։ Միաժամանակ հանրաքվեի է դրվել այլընտրանքային քաղաքացիական ծառայության բարեփոխման հարցը։ Խորհրդարանն առաջարկել է խստացնել զինվորական ծառայությունից անցման պայմանները, սակայն հակառակորդները կարծում են, որ դա չի լուծի բանակի համալրման խնդիրը։ Վերջին հարցումների համաձայն՝ այս հարցի շուրջ ընտրողների կարծիքները գրեթե հավասարապես են կիսվել։ Ձայնի իրավունք ունի մոտ 5,6 մլն մարդ։ Մասնակցությունը սովորաբար կազմում է 40%-ից 50%՝ կախված հանրաքվեի դրված հարցերի սրությունից։ Երկրի Դաշնային վիճակագրական գերատեսչության տվյալներով՝ վերջին տասը տարիների ընթացքում դաշնային հանրաքվեներին միջին մասնակցությունը կազմել է 41%-ից մինչև 57%։ Գործնականում դա նշանակում է, որ հանրաքվեում հաղթելու համար բավական է հավաքել 1,5 միլիոնից պակաս ձայն։
