Միջազգային քննադատները ջազ դաշնակահար Վարդան Օվսեփյանի և երգչուհի Տատիանա Պառռայի համագործակցությունը համարում են ժամանակակից կամերային ջազի բացարձակ կատարելություն։ Երաժիշտները, որոնք «Ֆրակտալ սահման» (Fractal Limit) նախագծի շնորհիվ միջազգային ճանաչում են ձեռք բերել, աննախադեպ համերգով հանդես կգան Երևանում։ Երեկոն տեղի կունենա հուլիսի 29-ին Կամերային երաժշտության ազգային կենտրոնում։ Վարդան Օվսեփյանը խոստովանում է՝ Պառռայի հետ դուետն իր ամենակարևոր նախագիծն է, որը մեկնարկել են 2013 թվականին։ «Երաժշտությամբ զբաղվելու ամենագրավիչ կողմերից մեկն այն է, որ կարող ես համագործակցել մոլորակի տարբեր ծայրերում ապրող երաժիշտների հետ։ Արվեստի այլ ճյուղերի պարագայում այդպես չէ. նկարիչները կամ բանաստեղծները հիմնականում միայնակ են գործում։ Հազվադեպ է հնարավոր հանդիպել նկարիչների, որոնք հանդես են գալիս համատեղ ցուցահանդեսով, կամ գրողների, որոնք համատեղ գիրք են հրատարակում, իսկ երաժիշտներիս մոտ համագործակցությունը միշտ ընթացքի մեջ է»,-նշում է Օվսեփյանը։ Նրա խոսքով՝ օտարազգիների հետ աշխատանքը նոր գաղափարների առիթ է ստեղծում, երաժշտության նոր շերտեր է բացահայտում։ «Նոր մշակույթի հետ առնչվելը, այն առավել խորն ուսումնասիրելը և միստիկ միաձուլումը, որն արդեն ջազի բնույթն է, չափազանց հետաքրքիր են և հնարավորություն են տալիս տեսնել, թե ինչպես են տարբեր ազգերի ֆոլկլյոր երաժշտության տարրերը միանում և նոր բանաձև ստեղծում»,-ընդգծում է դաշնակահարը։ Սպասվող համերգին Օվսեփյանն ու Պառռան կատարելու են իրենց վերջին՝ «Թաքնված սրտի թռիչքը» (The Flight of the Hidden Heart) ձայնասկավառակում ներառված ստեղծագործությունները։ Այն թողարկվել է երկու ամիս առաջ։ «Սկավառակը հիմնված է դեկոնստրուկտիվիզմ փիլիսոփայական ճյուղի վրա։ Կներկայացնենք փիլիսոփա Ժակ Դերիդայի ամբողջ գաղափարախոսությունը, որն արտացոլել ենք երաժշտության մեջ»,-նշում է Վարդան Օվսեփյանն ու հավելում՝ թե՛ ինքը, թե՛ Տատիանա Պառռան անհամբեր սպասում են Հայաստան գալուն։
