Օգոստոսի 3-ին կայացած Դիլիջան համայնքի ավագանու արտահերթ նիստում ընդունվել է որոշում՝ Դիլիջան համայնքի տարածքում գործող բոլոր ուսումնական հաստատություններ հաճախող աշակերտների և ուսանողների ներհամայնքային ուղևորափոխադրումների վճարների համար կիրառել զրոյական դրույքաչափ։ Այդ մասին հայտնում են Դիլիջանի համայնքապետարանից: Որոշումն ընդունվել է ավագանու 12 կողմ ձայնով և ուժի մեջ կմտնի 2026 թվականի սեպտեմբերի 1-ից։ Այսպիսով, նոր ուսումնական տարվանից Դիլիջան համայնքի քաղաքային և գյուղական բնակավայրերից ուսումնական հաստատություններ հաճախող աշակերտներն ու ուսանողները կկարողանան օգտվել ներհամայնքային տրանսպորտից անվճար՝ անկախ բնակության վայրից։ Որոշման նպատակն է աջակցել համայնքի երեխաներին և երիտասարդներին՝ ապահովելով նրանց համար ավելի հասանելի և մատչելի տեղաշարժ, ինչպես նաև նպաստել կրթական գործընթացի արդյունավետ կազմակերպմանը։
