ԱՄՆ նախագահ Դոնալդ Թրամփը Truth Social-ում հրապարակված գրառմամբ անդրադարձել է Իրանի ներկայացուցիչների՝ վերջին հինգ ամիսների ռազմական հակամարտության ընթացքում իրենց հասցված վնասների համար փոխհատուցում պահանջելու հարցին։ Թրամփը գրել է, որ Իրանի նման պահանջի մասին նախկին բանակցությունների կամ հանդիպումների ընթացքում երբևէ չի խոսվել։ «Տեսնում եմ, որ Իրանի Իսլամական Հանրապետության ներկայացուցիչները փոխհատուցում են պահանջում վերջին հինգ ամիսների ռազմական հակամարտության ընթացքում իրենց հասցված վնասների համար, չնայած մեր բանակցություններից կամ հանդիպումներից որևէ մեկի ընթացքում դրա մասին երբեք չի խոսվել»։ Թրամփը միաժամանակ նշել է, որ Իրանի կողմից փոխհատուցման պահանջ ներկայացնելու դեպքում ինքը նույնպես փոխհատուցման պահանջ է առաջադրում Իրանին։ «Սակայն սա հետաքրքիր գաղափար է, քանի որ այժմ ես նույնպես պահանջում եմ փոխհատուցում Իրանից՝ նրանց կողմից սպանված և ծանր վիրավորված բոլոր մարդկանց համար, որոնք զոհ են դարձել նրանց ճանապարհեզրային ռումբերի և բազմաթիվ հակամարտությունների հետևանքով, որոնցով նրանք հայտնի են եղել՝ սկզբում գեներալ Սոլեյմանիի առաջնորդությամբ»։ ԱՄՆ նախագահը հավելել է, որ իր պահանջը վերաբերում է նաև «USS Cole» նավի վրա սպանվածների ընտանիքներին և մարտական գործողությունների ընթացքում զոհված հազարավոր այլ մարդկանց ընտանիքներին։ «Բացի այդ, փոխհատուցում պետք է վճարվի այն հարյուր հազարավոր անմեղ ցուցարարների ընտանիքներին, որոնց Իրանը սպանել է վերջին 50 տարիների ընթացքում, էլ չասած վերջին հինգ ամիսների ընթացքում սպանված 52,000 մարդկանց մասին»։ «Ես իմ ներկայացուցիչներին հանձնարարել եմ այս պահանջը հստակորեն ներառել ցանկացած և բոլոր ապագա բանակցություններում»,-ընդգծել է ԱՄՆ նախագահը։
