ԱՄՆ-ն և Ճապոնիան համատեղ ծրագրում են ստեղծել աշխարհի ամենախորը ստորջրյա հանքավայրը՝ Մինամիտորիսիմա կղզու մերձակայքում՝ Խաղաղ օվկիանոսի հատակից 6 կմ խորությունից հազվագյուտ հողային մետաղներ արդյունահանելու նպատակով։ Այս նախաձեռնությունը նպատակ ունի նվազեցնել Չինաստանից կախվածությունը, որը ներկայումս վերահսկում է համաշխարհային արտադրության շուրջ 90 տոկոսը։ Ըստ Bloomberg-ի՝ Ճապոնիայի վարչապետ Սանաե Տակաիչին նախագիծը համարում է իր տնտեսական անվտանգության օրակարգի առանցքը՝ մինչև 2040 թվականը խոստանալով ներդնել մոտ 5.7 միլիարդ դոլար։ Տոկիոյի համալսարանի հետազոտողների գնահատմամբ՝ տվյալ հատվածում առկա պաշարները կարող են բավարարել համաշխարհային պահանջարկը հարյուրամյակներ շարունակ։ Թեև 6 կմ խորության վրա արդյունահանումը տեխնիկապես չափազանց բարդ է՝ ճնշման և ծախսերի պատճառով, կողմերը նախատեսում են 2027 թվականի փետրվարին փորձնական արդյունահանում իրականացնել, իսկ 2028-ին՝ անցնել լիարժեք առևտրային գործունեության։ Ծրագրի շուրջ լարվածությունը մեծանում է նաև աշխարհաքաղաքական առումով․ Ճապոնիան արդեն իսկ հակազդում է տարածաշրջանում Չինաստանի ռազմական ակտիվությանը՝ կղզում տեղակայելով հրթիռային համակարգեր և հետախուզական անօդաչուներ։
