ԱՄՆ նախագահի խորհրդական և փեսա Ջարեդ Քուշները բարձր է գնահատել Իսրայելի վարչապետ Բենիամին Նեթանյահուի հետ գրեթե չորս ժամ տևած հանդիպումը, որի ընթացքում քննարկվել են Գազայի հատվածի ապառազմականացման վերաբերյալ հարցեր։ Այս մասին Քուշներն ասել է Fox News-ի հետ հարցազրույցում։ «Կարծում եմ՝ այսօր մենք շատ լավ հանդիպում ունեցանք։ Մենք այնտեղ էինք գրեթե չորս ժամ նրա և նրա թիմի հետ՝ քննարկելով բոլոր մանրամասները։ Կարծում եմ՝ կային որոշ հիմնավոր մտահոգություններ, որոնք նրանք բարձրացրին, որոնց մենք կարողացանք անդրադառնալ, և կարողացանք քննարկել նաև որոշ թյուրըմբռնումներ և սխալ տեղեկատվություն, որը տարածվել էր դրա շուրջ։ Այսինքն՝ մենք շատ հավատարիմ ենք այն փաստին, որ ունենք Գազայի վերականգնման ծրագիր, բայց մենք թույլ չենք տա, որ Գազան վերակառուցվի, մինչև ապառազմականացումը տեղի չունենա», – նշել է Քուշները։ Նա նաև ասել է, որ չեն սահմանափակելու Իսրայելի ինքնապաշտպանության իրավունքը, եթե կան անխուսափելի սպառնալիքներ։ Քուշների խոսքով՝ նաև քննարկվել է մեխանիզմը, թե ինչ պետք է արվի զենքն իրականում դուրս բերելու առումով՝ հույս հայտնելով, որ կարող է առաջընթաց լինել ընդամենը 30 օրվա ընթացքում։ «Թեժ պատերազմ էր ընթանում, և այն, ինչ մենք կարողացել ենք իրականացնել նախագահ Թրամփի ղեկավարությամբ վերջին մեկ տարվա ընթացքում, բավականին ուշագրավ է, և ոչ ոք չէր կարծում, որ մենք կկարողանանք ավարտել այս պատերազմը», – նշել է նա։ Քուշները նաև հավելել է, որ 2014 թվականից ի վեր առաջին անգամ Գազայում չկան իսրայելցի ո՛չ ողջ պատանդներ, ո՛չ մահացած պատանդների աճյուններ։ «Եթե ՀԱՄԱՍ-ն իրոք հանձնի զենքերն ու թունելները՝ կամավոր կերպով հաջորդ 60-90 օրվա ընթացքում, դա Իսրայելի համար ակնհայտորեն կլինի հսկայական անվտանգության սպառնալիքի վերացում», – ասել է Քուշները։ Նա նաև ընդգծել է, որ հակառակ դեպքում Իսրայելը շատ ավելի մեծ աջակցություն կստանա ԱՄՆ-ից և մյուսներից՝ աշխատանքը պատշաճ կերպով ավարտելու համար։ «Վերջնական նպատակը Իսրայելի դուրսբերումն է Գազայից, բայց միայն այն դեպքում, երբ ՀԱՄԱՍ-ն իսկապես ապառազմականացվի, և այնտեղ լինի ամբողջական կառավարում, որը, հուսանք, կարող է օգնել ժողովրդի զարգացմանը։ Եվ մենք չենք ցանկանում, որ Գազան երբևէ կրկին սպառնալիք լինի Իսրայելի համար», – ասել է Քուշները։ Նեթանյահուի հետ հանդիպումից առաջ Քուշները Եգիպտոսում բանակցություններ էր վարել ՀԱՄԱՍ-ի առաջնորդների հետ։ Նա նշել է, որ ՀԱՄԱՍ-ի ղեկավարները վերահաստատել են իրենց հանձնառությունը նախագահ Թրամփի 20-կետանոց ծրագրին, ինչպես նաև 15-կետանոց ճանապարհային քարտեզին՝ Գազայում իրադրության կարգավորման շուրջ, և պատրաստ են վայր դնել զենքը։ Միևնույն ժամանակ, Քուշների խոսքով, ՀԱՄԱՍ-ի պաշտոնյաներն ասում էին «բոլոր ճիշտ բաները», սակայն «շատ դժվար է վստահել ահաբեկչական կազմակերպության»։ Հուլիսի վերջին Թրամփը հայտարարել էր, որ համաձայնության է եկել Գազայում ՀԱՄԱՍ-ի և այլ զինված խմբավորումների լիակատար զինաթափման շուրջ, սակայն Նեթանյահուն հրապարակայնորեն մերժել է Թրամփի ծրագիրը՝ պնդելով, որ ցանկացած կարգավորում պետք է ապահովի խմբավորման լիակատար զինաթափումը։
