Ամերիկացի դերասան Վին Դիզելը հայտնել է, որ «Ֆորսաժ» ֆիլմաշարի եզրափակիչ՝ «Ֆորսաժ ընդմիշտ» (Fast Forever) ֆիլմի նկարահանումները կսկսվեն 2026 թվականի դեկտեմբերին։ Դիզելի խոսքով՝ նկարահանումների մեկնարկը կախված է կինոստուդիայի պահանջների կատարումից։ Նա նշել է, որ ֆիլմի սցենարի մշակման վրա աշխատել է չորս տարի և փոխել է սցենարիստների չորս կազմ։ Դերասանը, որն ավելի քան 20 տարի գլխավոր դեր է կատարել ֆիլմաշարի բազմաթիվ մասերում, հայտնել է, որ սցենարի վերջնական տարբերակը կարդալուց հետո արտասվել է։ «Ֆորսաժ ընդմիշտ»-ը կլինի ֆիլմաշարի 11-րդ և վերջին մասը։ Ֆիլմի պրեմիերան նախատեսվում է 2028 թվականի մարտի 17-ին։ «Ֆորսաժը» «Universal» կինոստուդիայի ամենաերկարակյաց և եկամտաբեր ֆիլմաշարն է․ դրա ընդհանուր համաշխարհային հավաքը կազմել է մոտ 7,3 միլիարդ դոլար։
