Ուկրաինան, կարծես թե, դանդաղորեն պարտվում է Ռուսաստանի դեմ պատերազմում. Reuters գործակալությանը հայտարարել է Ուկրաինայի պաշտպանության նախկին նախարար Միխայիլ Ֆեոդորովը՝ նախազգուշացնելով, որ Կիևն ունի ընդամենը մի քանի ամիս՝ իրավիճակն իր օգտին բեկելու համար անհրաժեշտ առանցքային որոշումներ կայացնելու համար։ Ֆեոդորովը, ում Զելենսկին անցյալ ամիս է պաշտոնանկ արել, հայտարարել է, որ Ուկրաինային պակասում է ընդհանուր տեսլականը, թե ինչպես հաղթել չորս տարի տևող հակամարտությունում, և որ նրան հապաղեցնում է նորարարություններ անելու անկարողությունը։ Հարցազրույցում նա նաև նշել է, որ արմատացած կոռուպցիան ու հովանավորչական ցանցերը, ինչպես նաև պետական ինստիտուտներում քաղաքական անկախության բացակայությունը նույնպես հապաղեցնում են երկրի զարգացումը։ «Կարծում եմ, որ հիմա վրա է հասել բեկումնային պահը, որը կորոշի մեր հետագա հետագիծը, բայց նման է նրան, որ մենք աստիճանաբար, դանդաղորեն պարտվում ենք»,- ասել է Ֆեոդորովը՝ ակնհայտորեն շեղվելով Կիևի պաշտոնական հռետորաբանությունից։ Ուկրաինան դեռևս ունի հաղթելու «բոլոր շանսերը», բայց նրան շտապ անհրաժեշտ է պատերազմը դադարեցնելու ծրագիր, հավելել է նա։ Ի պատասխան Ֆեոդորովի մեկնաբանությունների՝ Ուկրաինայի նախագահի աշխատակազմը հայտարարել է, որ նա դրական էր արտահայտվում պատերազմի ընթացքի մասին, երբ զբաղեցնում էր նախարարի պաշտոնը, և միակ բանը, որ փոխվել է, նրա անձնական կարգավիճակն է։
