Անցած գիշեր անօդաչու թռչող սարքերի (ԱԹՍ) հարձակման են ենթարկվել Ozon ընկերության լոգիստիկ կենտրոնները Ռուսաստանի Օրենբուրգ և Ուֆա քաղաքներում։ Նախնական տվյալներով՝ տուժածներ չկան, հրդեհ չի բռնկվել։ Օրենբուրգի լոգիստիկ կենտրոնն արդեն վերսկսել է աշխատանքը։ Ուֆայի լոգիստիկ համալիրը ստացել է աննշան վնասներ, սակայն առայժմ փակ է, քանի որ անհրաժեշտ է մանրակրկիտ զննել տարածքը։ Ընկերությունից նաև հայտնել են, որ Ուֆայում ժամանակավորապես չեն ընդունում վաճառողների մատակարարումները, իսկ ճանապարհին գտնվող բեռները վերահասցեագրվում են այլ լոգիստիկ կենտրոններ։ Միաժամանակ հաճախորդները կարող են պատվերներ ձևակերպել սովորական կարգով։
