Մոսկվա այցի ընթացքում ԱՄՆ ԿՀՎ տնօրեն Ռատկլիֆը «կարող էր Ռուսաստանին ԱՄՆ դաշնակիցների դեմ չհարձակվելու հորդոր անել»։ Այդ մասին գրել է Politico-ն՝ հղելով «մի քանի աաղբյուրնեերի»։ Նույն կարծիքի են նաև The Wall Street Journal -ի փորձագետները։ «Նյու- Յորք թայսմի» աղբյուրները հայտնել են, որ ԿՀՎ տնօրենը ՌԴ Անվտանգության դաշնային ծառայության տնօրեն Բորտնիկովին «ռուս-ուկրաինական պատերազմում Ռուսաստանի կորուստների և տնտեսության ճգնաժամային վիճակի մասին տեղեկություններ է փոխանցել»։ Ներկայացնելով ամերիկյան «երեք հեղինակավոր լրատվամիջոցների դեռևս չճշտված տեղեկությունները» գերմանական «Դոյչե վելլեի» ռուսական խմբագրությունը իր հերթին պաշտոնապես չհաստատված տեղեկություն է փոխանցել, ըստ որի՝ ԿՀՎ տնօրեն Ռատկլիֆի Վաշինգտոն վերադարձի օրը «Սպիտակ տան արևմտյան թևում, որտեղ նախագահի Օվալաձև առանձնասենյակն է, Դոնալդ Թրամփը խորհրդակցություն է հրավիրել, որին մասնակցել են Պենտագոնի ղեկավարը և Միացյալ շտաբների պետը»։ Որքանո՞վ է այդ տեղեկատվությունը հավաստի, առայժմ հայտնի չէ։ Փոխարենը ԱՄՆ նախագահ Դոնալդ Թրամփը հրապարակայնացրել է, որ Վլադիմիր Պուտինի հետ հեռախոսազրույց է ունեցել։ Թրամփը վստահաբար ասել է, որ Պուտինը «ՆԱՏՕ-ի դեմ հարձակվելու մտադրություն չունի»։ Օգոստոսի 27-ին Բելառուսի նախագահի աշխատակազմին «մոտ կանգնած» թելեգրամ-ալիքը գրել է, որ Լուկաշենկոն «գտնվում է Մոսկվայում և ծրագրել է հանդիպում ունենալ» ՌԴ նախագահ Պուտինի հետ։ Օգոստոսի 28-ին ՌԴ նախագահի մամուլի քարտուղար Պեսկովը մամուլին տեղեկացրել է, որ Պուտինը «աշխատանքային այցով մեկնել է Նիժնի Նովգորոդ», իսկ բելառուսցի «պաշտոնակցի հետ կշփվի շաբաթ օրը»։ Բացառված չէ, որ Կրեմլը Պուտին-Լուկաշենկո հանդիպումը նույնպես դասել է «հրապարակայնացման ոչ ենթակա» բանակցությունների շարքին։ Եթե այդպես է, կարելի է ենթադրել, որ կողմերը կամ շատ կարևոր համաձայնության կհասնեն, կամ Լուկաշենկոն վերջին պահին «հրաժարվել է Ուկրաինայի դեմ հյուսիսային ճակատ բացել»։ Պեսկովը նաև ասել է, որ «առաջիկայում Պուտին-Թրամփ հեռախոսազրույց չի նախատեսվում»։ Անորոշ է, թե Մոսկվան ինչո՞ւ է հետևողականորն հերքում Պուտին-Թրամփ հեռախոսազրույցների մասին տեղեկությունը։ Փորձագետների մեծ մասը հիշեցնում է, որ 2021թ․ նոյեմբերին ԿՀՎ տնօրեն Բեռնսին «չի հաջողվել Պուտինին համոզել, որ Ուկրաինայի դեմ հարձակումը Ռուսաստանի համար անդառնալի հետևանքներ կունենա»։
