Ուկրաինայի նախագահ Վլադիմիր Զելենսկին հայտարարել է, որ Կիևը և ԱՄՆ-ը շարունակում են ակտիվ աշխատանքը՝ դիվանագիտական գործընթացը առաջ մղելու և հետագա հանդիպումները նախապատրաստելու ուղղությամբ։ Զելենսկին հայտնել է, որ Կիևում ԱՄՆ նախագահի ներկայացուցիչների հետ բանակցություններից հետո անցկացվել է բանակցային թիմի երեք փուլով քննարկում, որին միացել են նաև Ֆրանսիայի, Բրիտանիայի և Գերմանիայի ներկայացուցիչները։ Նրա խոսքով՝ նախօրեին ինքը առանձին հանդիպում է ունեցել Սթիվ Ուիթքոֆի և Ջարեդ Քուշների հետ՝ օրվա բանակցությունների արդյունքները քննարկելու համար։ Ուկրաինայի նախագահի խոսքով՝ այժմ ամենակարևորն է շարունակել համատեղ ակտիվ աշխատանքը՝ դիվանագիտական գործընթացը գործնականում պահպանելու համար։ Քննարկումների առանցքում, մասնավորապես, եղել են Ուկրաինայի հակաօդային պաշտպանության կարիքները, համապատասխան տեխնոլոգիական համագործակցությունը և ձմռան համար անհրաժեշտ աջակցության փաթեթը։ Զելենսկին նշել է, որ Ուկրաինայի գործընկերները տեղյակ են, թե ինչ քայլեր կարող են արդյունավետ լինել և ինչ միջոցներ պետք է իրականացվեն մինչև ձմռան սկիզբը։ Նրա խոսքով՝ կողմերը համակարգում են հաջորդ քայլերը և պատրաստվում նոր հանդիպումների ու շփումների։ «Ուկրաինայի առաջարկները կառուցողական են, և այդպիսին դրանք միշտ կլինեն», — հայտարարել է Զելենսկին՝ ընդգծելով Կիևի պատրաստակամությունը շարունակելու դիվանագիտական աշխատանքը։
