Չինաստանի նախագահ Սի Ծինփինն ու Ռուսաստանի նախագահ Վլադիմիր Պուտինը վերահաստատել են Հյուսիսային Կորեայի հետ իրենց երկրների սերտ հարաբերությունների պահպանման և խորացման պատրաստակամությունը։ Այդ մասին սեպտեմբերի 9-ին հայտնել է Հյուսիսային Կորեայի պետական լրատվական գործակալությունը՝ KCNA-ն։ Հաղորդագրությունների համաձայն՝ Սի Ծինփինը Հյուսիսային Կորեայի առաջնորդ Կիմ Չեն Ընին ուղղված ուղերձում նշել է, որ Պեկինը շարունակում է հավատարիմ մնալ երկու երկրների միջև հարաբերությունների զարգացմանն ու ռազմավարական համակարգման ամրապնդմանը։ Ռուսաստանի նախագահ Վլադիմիր Պուտինը ևս ուղերձ է հղել Կիմ Չեն Ընին՝ ընդգծելով Փհենյանի հետ «համապարփակ ռազմավարական գործընկերության» շրջանակում համագործակցությունը շարունակելու պատրաստակամությունը։ Պուտինի խոսքով՝ հարաբերությունների խորացումը կնպաստի տարածաշրջանային անվտանգությանը և բազմաբևեռ աշխարհակարգի ձևավորմանը։ Ռուսաստանի և Հյուսիսային Կորեայի միջև ռազմական համագործակցությունը զգալիորեն ընդլայնվել է 2023 թվականից։ Երկու երկրները 2024 թվականին ստորագրել են ռազմավարական գործընկերության պայմանագիր, որը ներառում է նաև փոխադարձ պաշտպանության դրույթ։ Ուկրաինայի և արևմտյան երկրների պաշտոնյաների տվյալներով՝ Հյուսիսային Կորեան Ռուսաստանին տրամադրել է բալիստիկ հրթիռներ և հրետանային զինամթերք՝ Ուկրաինայի դեմ պատերազմում օգտագործելու համար։ Բացի այդ, Փհենյանը, ըստ Հարավային Կորեայի, Ուկրաինայի և արևմտյան պաշտոնյաների գնահատականների, շուրջ 14 հազար զինվոր է ուղարկել Ռուսաստանի Կուրսկի մարզ՝ ռուսական ուժերի կողքին մարտական գործողություններին մասնակցելու համար։ Նույն աղբյուրների տվյալներով՝ նրանցից ավելի քան 6 հազարը զոհվել է։ Չինաստանի և Ռուսաստանի ղեկավարների ուղերձները հրապարակվել են Հյուսիսային Կորեայի իշխող Աշխատավորական կուսակցության պաշտոնաթերթ «Ռոդոն Սինմունի» առաջին էջում։ Հյուսիսային Կորեան պետականորեն հիմնադրվել է 1948 թվականի սեպտեմբերի 9-ին։ Այս տարի երկիրը նշում է իր հիմնադրման 78-րդ տարեդարձը։
