Հայաստանում 2026 թվականի առաջին կիսամյակում աճել է բոլոր տեսակի տրանսպորտով իրականացված բեռնափոխադրումների ընդհանուր ծավալը։ Հունվար-հունիսին փոխադրվել է 7 մլն 897.4 հազար տոննա բեռ, ինչը նախորդ տարվա նույն ժամանակահատվածի համեմատ 4.2 տոկոսով ավելի է։ Բեռնափոխադրումների ամենամեծ ծավալը բաժին է ընկել ավտոմոբիլային տրանսպորտին։ Այս եղանակով առաջին վեց ամիսներին փոխադրվել է 5 մլն 804.8 հազար տոննա բեռ։ Միաժամանակ, նախորդ տարվա հունվար-հունիսի համեմատ ավտոմոբիլային բեռնափոխադրումների ծավալը 0.5 տոկոսով նվազել է։ Երկաթուղային տրանսպորտով 2026 թվականի հունվար-հունիսին փոխադրվել է 917.3 հազար տոննա բեռ։ Սա 2025 թվականի նույն ժամանակահատվածի ցուցանիշից 24.7 տոկոսով ավելի է։ Մայրուղային խողովակաշարային տրանսպորտով փոխադրումների ծավալը կազմել է 1 մլն 154.1 հազար տոննա՝ տարեկան կտրվածքով գրանցելով 16.6 տոկոս աճ։ Օդային տրանսպորտով առաջին կիսամյակում փոխադրվել է 21.2 հազար տոննա բեռ, ինչը նախորդ տարվա նույն ժամանակահատվածի համեմատ 12.8 տոկոսով ավելի է։ Վիճակագրական տվյալների համաձայն՝ երկաթուղային բեռնափոխադրումների կազմում հիմնական բեռներից են եղել գունավոր մետաղների հանքաքարը, նավթն ու նավթամթերքը, հանքային շինարարական նյութերը, հացահատիկն ու աղացվող մթերքները, ինչպես նաև քիմիական և հանքային պարարտանյութերը։
