Գերմանական բնապահպանական BUND կազմակերպությունը դատական հայց է ներկայացրել ընդդեմ ռուսական պետական «Ռոսատոմ» ընկերության՝ Ստորին Սաքսոնիայի Լինգեն քաղաքում գտնվող վառելիքային տարրերի գործարանի հետ համագործակցելու համար։ Այդ մասին տեղեկացնում է Deutsche Welle-ն։ Հայցին միացել է նաև հակամիջուկային Ausgestrahlt կազմակերպությունը։ Լյունեբուրգի վարչական բարձրագույն դատարանը հաստատել է բողոքի ստացումը։ Լինգենում գտնվող գործարանը «Ռոսատոմ»-ի հետ ցանկանում է արտադրել ռուսական նախագծմամբ վառելիքային հավաքակայաններ՝ նախատեսված Արևելյան Եվրոպայի այն երկրների համար, որոնք դեռևս շահագործում են խորհրդային և ռուսական տեխնոլոգիաների վրա հիմնված ատոմակայաններ։ Ստորին Սաքսոնիայի շրջակա միջավայրի պահպանության նախարարությունը հուլիսին հաստատել էր նախագիծը՝ որոշակի պայմաններով։ Նախագծին կանաչ լույս տրվեց այն ժամանակ, երբ դաշնային կառավարությունն իրականացրեց ստուգում և չհայտնաբերեց լրտեսության կամ դիվերսիայի էական ռիսկեր։
