Եմենում ընթացող մարտական գործողություններից փրկված ավելի քան 2000 մարդ հատել է Կարմիր ծովը և հասել Արևելյան Աֆրիկայում գտնվող Ջիբութի: Այդ մասին հայտնել է Ջիբութիի էկոնոմիկայի և ֆինանսների նախարար Իլյաս Մուսա Դավալեհը։ «Ներկայում Ջիբութի է ժամանել ավելի քան 2084 փախստական։ Այս ցուցանիշների պայմաններում իրավիճակը էլ ավելի է բարդանում մեր երկրի համար, չնայած հումանիտար օգնություն ապահովելու մեր անսասան հանձնառությանը»,- գրել է նա X սոցիալական ցանցում։ Միգրացիայի միջազգային կազմակերպության տեղեկատվության համաձայն, սեպտեմբերին Եմենում ռազմական գործողությունների ակտիվացման պատճառով 82 հազար մարդ հարկադրված է եղել լքել տները։ Եմենում հակամարտությունն սկսվել է 2014 թվականին. 2022 թ. ի վեր այնտեղ նկատվում էր հարաբերական անդորր։ 2026 թ. հուլիսի սկզբից երկրի տարբեր շրջաններում ակտիվացել են կառավարական զորքերի և հութիների միջև մարտերը։ Անցյալ շաբաթ հութիները հարձակողական գործողություն են անցկացրել, ինչի հետևանքով իրենց վերահսկողության տակ են վերցրել Կարմիր ծովի ողջ եմենական ափը և այն տարածքները, որոնք հարակից են Բաբ էլ Մանդեբի նեղուցին։
