«Volkswagen»-ի էլեկտրական «ID. Buzz» մինիվենի վերադարձը ԱՄՆ-ի շուկա կրկին հետաձգվել է։ Նախատեսվում էր, որ այն 2027 մոդելային տարվա տարբերակով վաճառքում կհայտնվի այս աշնանը, սակայն այժմ ամերիկացի գնորդները ստիպված կլինեն սպասել մինչև 2027 թվականի առաջին կեսը, երբ շուկա դուրս կգա արդեն 2028 մոդելային տարվա «ID. Buzz»-ը։ «Volkswagen»-ը փոփոխության մասին ԱՄՆ-ի դիլերներին տեղեկացրել է սեպտեմբերի 24-ին։ Մոդելն ԱՄՆ-ում բաց կթողնի երկու հաջորդական մոդելային տարի՝ 2026-ն ու 2027-ը։ 2028 թվականի «ID. Buzz»-ում նախատեսվում է պահպանել նախկինում հայտարարված մի շարք փոփոխություններ։ Դրանց թվում են ճամբարային օգտագործման համար նախատեսված «Tourer» տարբերակը, երկգույն թափքը, ղեկի ֆիզիկական կոճակները և «North American Charging Standard» (NACS) լիցքավորման ստանդարտի աջակցումը։ Նոր մոդելը կունենա նաև թարմացված ծրագրային ապահովում, «Vehicle-to-load» (V2L) ֆունկցիա, որը թույլ է տալիս մեքենայի մարտկոցից էլեկտրաէներգիա տրամադրել այլ սարքերի, ինչպես նաև թվային բանալի։ «Volkswagen»-ը չի հայտնել հետաձգման հստակ պատճառը և չի ներկայացրել նոր գինը։
