ԱՄՆ փոխնախագահ Ջեյ Դի Վենսը, որը համարվում է 2028 թվականի նախագահական ընտրություններում հավանական թեկնածուներից մեկը, խոստովանել է, որ Կոնգրեսի միջանկյալ ընտրությունների արդյունքները կարող են ազդել 2028-ին երկրի բարձրագույն պաշտոնի համար պայքարելու մասին իր որոշման վրա։ Այս մասին նա ասել է NBC News-ի հետ զրույցում։ «Որոշում կայացնելիս հարկավոր է հնարավորինս շատ տեղեկություն հավաքել և փորձել ողջամիտ որոշում ընդունել։ Այո՛, անկախ նրանից, թե ինչ տեղի կունենա առաջիկա 35 օրվա ընթացքում, կհայտնվեն նոր տեղեկություններ և տվյալներ, որոնց շուրջ անհրաժեշտ կլինի որոշում կայացնել», – ասել է նա՝պատասխանելով հարցին՝ արդյոք Կոնգրեսի ընտրություններում հանրապետականների հնարավոր պարտությունը կարող է ազդել իր քաղաքական ծրագրերի վրա։ «Այս պահին ես փորձում եմ չկենտրոնանալ ենթադրյալ սցենարների վրա։ Ես պարզապես կփորձեմ, որքան հնարավոր է, լավ աշխատել և մարդկանց քաջալերել ընտրել այն թեկնածուներին, որոնց արժանի եմ համարում։ Ամերիկացի ժողովուրդը կկայացնի իր որոշումը, և երբ դա տեղի ունենա, այո՛, այդ ժամանակ ես կունենամ նոր տեղեկություններ՝ դիտարկելու համար», – հավելել է Վենսը։ ԱՄՆ փոխնախագահը բազմիցս ընդգծել է, որ կենտրոնացած է միջանկյալ ընտրություններում իր կուսակցության հաջողությանն աջակցելու վրա և 2028 թվականին նախագահի պաշտոնի համար պայքարելու վերաբերյալ որոշում կկայացնի միայն ընտրությունների ավարտից հետո։ Կոնգրեսի միջանկյալ ընտրությունները տեղի կունենան նոյեմբերի 3-ին. ամերիկացիները կընտրեն Սենատի 100 անդամներից 33-ին և Ներկայացուցիչների պալատի բոլոր 435 անդամներին։
