Ղրղզստանը, Ուզբեկստանը, Թուրքմենստանը, Ադրբեջանը, Վրաստանը և Թուրքիան ստորագրել են միջազգային բազմամոդալ CASCA+ տրանսպորտային միջանցքի զարգացման վերաբերյալ վեցակողմ նոր արձանագրություն։ Համաձայնությունը ձեռք է բերվել հոկտեմբերի 7-8-ը Տաշքենդում կայացած երկաթուղային վարչությունների ղեկավարների հանդիպման արդյունքում։ Փաստաթղթի նպատակն է բարձրացնել Ասիա–Եվրոպա ուղղությամբ բեռնափոխադրումների մրցունակությունը՝ ավելացնելով բեռնահոսքերը, բարելավելով սակագնային քաղաքականությունը և կրճատելով լոգիստիկ ուշացումները։ Կողմերը պայմանավորվել են հատուկ ուշադրություն դարձնել սառնարանային բեռնարկղերով փոխադրումներին, համապատասխան երկաթուղային հարթակների կանոնավոր տրամադրմանը և նավահանգիստներում բեռնարկղերի պարապուրդի ժամանակի կրճատմանը։ CASCA+ միջանցքը գործարկվել է 2019 թվականին՝ Կենտրոնական Ասիան, Հարավային Կովկասը և Թուրքիան կապելու, ինչպես նաև դեպի եվրոպական շուկա ելք ապահովելու նպատակով։ Ուզբեկստանի պաշտոնական տվյալներով՝ 2024 թվականին այս երթուղով երկրի արտահանման և ներմուծման բեռնափոխադրումների ծավալը հասել է 1 միլիոն տոննայի՝ 2019 թվականի համեմատ աճելով մոտ հինգ անգամ։ Միջանցքի հետագա զարգացման հիմնական մարտահրավերներից մեկը ենթակառուցվածքների թողունակությունն է։ Չինաստան–Ղրղզստան–Ուզբեկստան երկաթուղու ավարտից հետո CASCA+ երթուղով բեռնափոխադրումների ծավալը կարող է զգալիորեն աճել՝ մեծացնելով նավահանգիստների, երկաթուղային հանգույցների և տերմինալների արդիականացման անհրաժեշտությունը։ Նոր արձանագրությունը Կենտրոնական Ասիայի երկրներին լրացուցիչ հնարավորություններ է տալիս Կասպից ծովի, Հարավային Կովկասի և Թուրքիայի միջոցով դեպի եվրոպական շուկաներ դուրս գալու համար։ Իսկ Ադրբեջանը, Վրաստանն ու Թուրքիան կարող են ամրապնդել իրենց տարանցիկ դերը՝ Կենտրոնական Ասիան Եվրոպային կապող երթուղիներում։
