Ֆրանսիայի ներքին գործերի նախարար Լորան Նունյեսը, որն ավելի վաղ ոստիկանությանն արգելել էր բարձր դասարանների աշակերտների ցույցերը ցրելու համար լուսաձայնային նռնակներ օգտագործել ցուցարարների ստացած վնասվածքների պատճառով, թույլատրել է դրանց կիրառումը հոկտեմբերի 17-ին պլանավորված ակցիայի ժամանակ։ Այս մասին նա ասել է France 2 հեռուստաալիքի եթերում։ «Վաղը եթե երթի ծայրամասում կամ որևէ այլ վայրում նորից առաջանան չափազանց լուրջ քաղաքային անկարգություններ, ապա, անշուշտ, այս տեսակի զենք կարող է կիրառվել», – ասել է նա՝ խոսելով հոկտեմբերի 17-ին Փարիզում պլանավորված աշակերտների բողոքի ակցիայի ժամանակ լուսաձայնային նռնակներ օգտագործելու մասին։ Նախարարի խոսքով՝ ոստիկանության աշխատակիցներն անկարգությունների և բռնության դեպքում պետք է հնարավորություն ունենան օգտագործել իրենց տրամադրության տակ եղած ողջ զինանոցը՝ և՛ արցունքաբեր գազ, և՛ ռետինե փամփուշտներ կրակող զենք։ Ֆրանսիան դադարեցրել էր աշակերտական բողոքի ակցիաները վերահսկելու համար լուսաձայնային նռնակների կիրառումն այն բանից հետո, երբ օրեր առաջ 15-ամյա դեռահասը նման նռնակի պայթյունի հետևանքով զրկվել էր ձեռքից։ Արդեն մի քանի շաբաթ է, ինչ Ֆրանսիայի ավագ դպրոցների աշակերտները զանգվածաբար բողոքում են գերծանրաբեռնված դասացուցակի, ուսուցիչների պակասի և կրթության ոլորտում առկա այլ խնդիրների դեմ։ Առանձին ակցիաներ ուղեկցվել են անկարգություններով։ Հոկտեմբերի 13-ին Փարիզում դպրոցականների և ուսանողների զանգվածային ցույցի ժամանակ ոստիկանությունը ցուցարարներին ցրելու համար կիրառել է արցունքաբեր գազ և ջրցան մեքենա, իսկ հոկտեմբերի 6-ի ցույցի ժամանակ՝ արցունքաբեր գազ և լուսաձայնային նռնակներ։ Ֆրանսիայի ամբողջ տարածքում բարձր դասարանցիների բողոքի ակցիաների ընթացքում տուժել է ավելի քան 1300 մարդ։
