ԱՄՆ պետքարտուղար Մարկո Ռուբիոյի՝ Ուզբեկստան կատարած այցի ընթացքում ռուսաց լեզվի կարգավիճակի վերաբերյալ արած հայտարարությունը լայն քննարկումների տեղիք է տվել երկրի լրատվամիջոցներում և սոցիալական ցանցերում։ Ռուբիոն հայտարարել էր, որ ռուսերենն այլևս Ուզբեկստանի պաշտոնական լեզուն չէ։ Նրա խոսքերը տարբեր արձագանքների են արժանացել․ ոմանք դրանք գնահատել են որպես Ուզբեկստանի լեզվական ինքնիշխանության մասին հիշեցում, իսկ մյուսները՝ որպես դիվանագիտական ուղերձ, որը վերաբերում է Կենտրոնական Ասիայի համար զգայուն՝ լեզվի և ազգային ինքնության հարցերին։ Դեպքը տեղի է ունեցել հոկտեմբերի 21-ին նշվող Ուզբեկստանի լեզվի օրվան ընդառաջ՝ կրկին ուշադրության կենտրոնում պահելով ուզբեկերենի և ռուսերենի կարգավիճակի, ինչպես նաև կիրիլյան այբուբենի կիրառման հարցերը։ Սամարղանդում մի խումբ լրագրողների հետ զրույցի ընթացքում նա լրագրողներից մեկին հարցրել է․ «Դուք տեղական լեզվո՞վ եք խոսում։ Ուզբեկերե՞ն»։ Լրագրողը փորձել է պատասխանել ռուսերենով՝ նշելով, որ որոշ չափով տիրապետում է այդ լեզվին։ Ի պատասխան՝ Ռուբիոն կարճ նկատել է․ «Ա՜, հասկացա։ Այն այստեղ այլևս պաշտոնական լեզու չէ։ Բայց դա լավ է։ Ես հասկանում եմ, որ շատերն են խոսում այդ լեզվով»։ Ուզբեկստանի նախագահ Շավքաթ Միրզիյոևն իր հերթին ընդգծել է պետական լեզվի դերի ամրապնդման կարևորությունը հասարակական կյանքում և պետական մարմինների աշխատանքում։
