Վիգեն և Վահե Բադալյանների հիմնադրած SoftConstruct միջազգային բիզնես խմբի հետ կապվող բրազիլական ընկերությունը ներգրավված է բազմաթիվ դատական վեճերում։ Դրանց զգալի մասը վերաբերում է աշխատակիցների չվճարված գումարներին, աշխատանքից ազատման հետևանքով առաջացած պարտավորություններին և փոխկապակցված ընկերությունների պատասխանատվությանը։ Բրազիլիայի դատական գործերի տվյալները հավաքագրող Escavador համակարգում Soft Construct Brasil Ltda ընկերությունը հիշատակվում է 173 դատական վարույթներում։ Դատարանների հրապարակված փաստաթղթերը հնարավորություն են տալիս ուսումնասիրելու ընկերությունների միջև գործարար և կառավարչական կապերը, ինչպես նաև աշխատակիցների նկատմամբ ֆինանսական պարտավորությունների կատարման խնդիրները։ 2026 թվականի սեպտեմբերի 29-ին Ռիո դե Ժանեյրոյի աշխատանքային դատարան է ներկայացվել նոր հայց, որի պատասխանողների թվում է Soft Construct Brasil-ը։ Հայցվորը՝ Ամանդա Կարոլինա Մորեյրա Տեյշեյրան, բարձրացրել է աշխատանքային հարաբերությունների հետ կապված պահանջներ։ Գործը քննվում է Ռիո դե Ժանեյրոյի 29-րդ աշխատանքային դատարանում՝ 0101396-70.2026.5.01.0029 համարով։ Հրապարակային ռեգիստրում վարույթը նշված է որպես ակտիվ, իսկ դատական նիստը նշանակված է 2027 թվականի ապրիլի 29-ին։ Soft Construct Brasil-ը որպես պատասխանող ներգրավված է նաև Վիկտոր Ուգո Ալվես Պինտոյի՝ 2026 թվականին հարուցված աշխատանքային գործով։ Հայցը վերաբերում է աշխատանքային պայմանագրի դադարեցումից հետո հասանելիք գումարների վճարմանը։ Գործը քննվում է Ռիո դե Ժանեյրոյի 62-րդ աշխատանքային դատարանում։ Դատական փաստաթղթերում առանձնանում է Էստեֆանի Ֆրեյտաս Բարբոսայի հայցով կայացված վճիռը։ Աշխատակիցը պահանջել էր վճարել աշխատանքից ազատման հետևանքով առաջացած պարտավորությունները, օրենքով նախատեսված տուգանքները և բարոյական վնասի փոխհատուցումը։ Հայցի արժեքը կազմել էր 74 հազար 282 բրազիլական ռեալ։ Դատարանը ճանաչել է տնտեսական խմբի առկայությունը Atomos Tecnologia e Gestão, SC Operating Brazil, Soft Construct Brasil, Hope Gaming և Brandex Tecnologia e Gestão ընկերությունների միջև՝ նրանց նկատմամբ սահմանելով համատեղ պատասխանատվություն աշխատանքային պարտավորությունների համար։ Դատական նյութերի համաձայն՝ հաճախորդների սպասարկման կառավարման պաշտոն զբաղեցրած աշխատակիցը 2025 թվականի ապրիլին ազատվել էր աշխատանքից և պնդել, որ չէր ստացել իրեն հասանելիք ամբողջական վճարումները։ Գործի քննության ընթացքում դատարանն ուսումնասիրել է պատասխանող ընկերությունների միջև տնտեսական և կազմակերպական կապերը՝ պարզելու նրանց պատասխանատվության շրջանակը։ Այս վճիռն առանձնահատուկ նշանակություն ունի բրազիլական բիզնեսի կառուցվածքն ուսումնասիրելու համար։ Դատարանի ճանաչած տնտեսական խումբը ներառում է տարբեր իրավաբանական անձանց, որոնց գործունեության և ֆինանսական պարտավորությունների միջև արձանագրվել են իրավական կապեր։ Դատական այդ եզրահանգումը հիմք է տալիս ուսումնասիրելու նաև մյուս աշխատանքային վեճերում ներգրավված ընկերությունների պատասխանատվությունը։ Բրազիլական գրանցման տվյալներով՝ Soft Construct Brasil-ը հիմնադրվել է 2024 թվականի փետրվարի 26-ին՝ Սան Պաուլոյում։ Ընկերության գրանցման համարը 54.075.472/0001-32 է, իսկ հայտարարագրված կանոնադրական կապիտալը՝ 100 բրազիլական ռեալ։ Գրանցման տվյալներում որպես օտարերկրյա իրավաբանական անձ-բաժնետեր նշված է Soft Construct Limited-ը, իսկ որպես կառավարիչ՝ Էվերարդո Վիլսոն Պոնտես դե Օլիվեյրան։ Soft Construct Brasil-ի հետ դատական բազմաթիվ վարույթներում հիշատակվում է նաև SC Operating Brazil-ը։ Escavador-ի տվյալներով՝ երկու ընկերությունները համատեղ ներգրավված են շուրջ 170 գործերում։ Նրանց միջև առնչությունները բացահայտում են բրազիլական գործունեության կազմակերպական կառուցվածքի լրացուցիչ ուսումնասիրության անհրաժեշտությունը։ Վիգեն և Վահե Բադալյանների կապը SoftConstruct միջազգային բիզնեսի հետ հաստատվում է խմբի վերաբերյալ հրապարակված պաշտոնական կենսագրական տվյալներով։ «Ֆասթ բանկի» կայքում Վիգեն Բադալյանը ներկայացված է որպես SoftConstruct-ի հիմնադիրներից մեկը, իսկ Վահե Բադալյանը՝ խմբի տեխնոլոգիական ընկերությունների համահիմնադիր։ Բրազիլիան նույնպես հիշատակվում է նրանց միջազգային գործարար գործունեության աշխարհագրության մեջ։ Ուշագրավ է, որ բրազիլական ընկերությունների մասնակցությամբ դատական գործընթացներին զուգահեռ Բադալյանների միջազգային խումբը շարունակում է ակտիվորեն ընդլայնել իր ներկայությունը երկրի խաղային շուկայում։ 2026 թվականի մարտին SoftConstruct խմբի հետ կապվող CreedRoomz ընկերությունը մասնակցել է Ռիո դե Ժանեյրոյում կազմակերպված SBC Summit Rio միջազգային ցուցահանդեսին՝ ներկայացնելով ութ նոր խաղային արտադրանք։ Մարտի 4-ին ընկերությունը կազմակերպել է նաև գործարար հանդիպում BOTA Marina da Glória համալիրում։ Միջոցառման հայտարարությունն անձամբ
